गुजरातमध्ये भाजपला मोठा धक्का, खासदार मनसुख वसावा यांचा राजीनामा

गुजरातमध्ये सहावेळा खासदार म्हणून निवडून आलेले आणि माजी केंद्रीय राज्यमंत्री मनसुख भाई वसावा यांनी भाजपच्या सदस्यत्वाचा राजीनामा दिला आहे. तसेच येत्या बजेट अधिवेशनात आपण खासदारकीचाही राजीनामा देणार असल्याचे त्यांनी गुजरात भाजपचे अध्यक्ष सी.आर. पाटील यांना लिहिलेल्या पत्रात म्हटले आहे.

केंद्रीय पर्यावरण मंत्रालयाने गुजरातमधील 121 आदिवासी गावांना पर्यावरणीय दृष्ट्या अतिसंवेदनशील क्षेत्र जाहीर केल्याने मसावा यांनी नाराजी व्यक्त केली होती. तसेच यासंदर्भात त्यांनी वारंवार पाठपुरावा केला होता. पण त्यांचे म्हणणे ऐकून न घेतल्याबद्दल त्यांनी राजीनामा दिल्याची चर्चा आहे. "मी एक मनुष्य आहे आणि मनुष्याकडून चुका होतात, पण माझ्या चुकांमुळे पक्षाला त्रास होऊ नये म्हणून मी पक्षाचा राजीनामा देत आहे" असे त्यांनी आपल्या पत्रात म्हटले आहे.

दरम्यान गुजरात भाजपचे प्रवक्ते भरत पंड्या यांनी मनसुखभाई हे पक्षाचे ज्येष्ठ नेते आहेत आणि त्यांच्या ज्या काही समस्या आहेत त्या सोडवण्यासाठी सर्व प्रयत्न केले जातील, असे सांगितले आहे.