Jawed Habib वादात, भाजपचा थुक जिहाद?

हेअर स्टायलिस्ट जावेद हबीब याने भर कार्यक्रमात हेअर स्टाईल करताना एका महिलेच्या डोक्यावर थुंकल्याने मोठा वाद निर्माण झाला आहे. एका वर्कशॉप दरम्यान जावेदने हेअर स्टाईलचे प्रशिक्षण देताना एका महिला स्टेजवर बोलावले आणि पाणी नसेल तर थुंका असे सांगत तिच्या डोक्यावर तो थुंकला आहे. जावेदने ज्या महिलेबाबत हा प्रकार केला, तिने सांगितल्यानुसार, "आपण जावेद हबीब याचे वर्कशॉप अटेंड केले. त्याने मला हेअऱ स्टाईलसाठी स्टेजवर बोलावले. तो म्हटला की जर पाणी नसेल तर तुमची थुंकी वापरा. यापुढे मी रस्त्यावरील सलूनमध्ये जाईन पण हबीबकडे कधीही जाणार नाही,"असे या महिलेने म्हटले आहे. ही महिला स्वत: देखील एक ब्युटी पार्लर चालवते.

आता जावेद हबीबच्या या कृत्यावरुन आयटी सेलच्या अनेकांनी धार्मिक रंग देत ट्रोलिंग सुरू केले. एका हिंदु महिलेच्या डोक्यावर जावेद थुंकला, असा प्रचार सुरू झाला. तर दुसरीकडे राष्ट्रीय महिला आयोगाने आदेश दिल्यानंतर उ.प्रदेश पोलिस कामाला लागले. भाजप समर्थक अनेकांनी या घटनेचा निषेध कारवाईची मागणी केली. दरम्यान जावेद हबीब याने सोशल मीडियाच्या माध्यमातून माफी मागत यावर पडदा टाकण्याचा प्रयत्न केला. एका ट्विटर युजरने तर आमीर खानच्या एका वक्तव्याचे संदर्भ देत धार्मिक तेढ वाढवण्याचा प्रयत्न केला.

एकीकडे अनेक हिंदुत्ववादी ट्रोलर्स जावेदला टार्गेट करत असताना अनेक ट्विट युजर्सने तो भाजपचा सदस्य असल्याचे ट्विट केले, त्यानंतर मात्र काही भाजप समर्थकांची भाषाच बदलली..

एकीकडे हिंदुत्ववादी असलेल्या ट्विटज युजर्सने जावेद हबीबवर कारवाईची मागणी केली आहे,तर दुसरीकडे भाजपने मात्र यावर कोणतीही भूमिका जाहीर केलेली नाही. एका महिलेचा जाहीरपणे असा अपमान भाजपचा अधिकृत सदस्य असलेला व्यक्ती करतो आणि त्यावर पक्ष कारवाई करत नाही, त्यामुळे हा भाजपचा थुक जिहाद आहे का असा सवाल उपस्थित होतो आहे.