सणासुदीचा जोर ओसरला ! नोव्हेंबरमध्ये वाहन विक्रीला 'ब्रेक'

ऑक्टोबर महिन्यात जीएसटी कपात आणि सणासुदीच्या आकर्षक ऑफर्समुळे वाहन विक्रीने उच्चांक गाठला होता. मात्र, नोव्हेंबर महिन्यात हा उत्साह काहीसा ओसरल्याचे चित्र आहे. सोमवारी ऑटोमोबाईल कंपन्यांनी जाहीर केलेल्या आकडेवारीनुसार, नोव्हेंबरमध्ये देशांतर्गत बाजारपेठेत वाहन विक्रीत महिन्या-दर-महिन्याला (Month-on-Month) घट झाली आहे.

चारचाकी (PV) विभागातील स्थिती: उदाहरणार्थ, दिग्गज कंपनी महिंद्रा अँड महिंद्राने (M&M) ऑक्टोबरमध्ये ७१,६२४ वाहनांची (डीलरकडे पाठवलेली होलसेल विक्री) नोंद केली होती. त्या तुलनेत नोव्हेंबरमध्ये ही संख्या ५६,३३६ युनिट्सपर्यंत खाली आली असून, यात महिन्याला २१.३ टक्क्यांची घट झाली आहे.

त्याचप्रमाणे, टोयोटा किर्लोस्कर मोटरने (TKM) देखील मासिक विक्रीत ३४.३ टक्क्यांची मोठी घसरण नोंदवली आहे. ऑक्टोबरमधील ४०,२५७ युनिट्सच्या तुलनेत या नोव्हेंबरमध्ये कंपनीने केवळ २६,४१८ वाहनांची देशांतर्गत विक्री केली.

दुचाकी (Two-Wheeler) विभागातील स्थिती: दुचाकी सेगमेंटमध्येही मंदीचे सावट दिसून आले. टीव्हीएस मोटरची (TVS Motor) देशांतर्गत होलसेल विक्री १३.२ टक्क्यांनी घटली आहे. ऑक्टोबरमधील ४,२१,६३१ युनिट्सच्या तुलनेत नोव्हेंबरमध्ये ३,६५,६०८ वाहने विकली गेली.

'पल्सर' सारख्या लोकप्रिय बाईकची निर्मिती करणाऱ्या बजाज ऑटोने (Bajaj Auto) मागील महिन्यातील २,६६,४७० युनिट्सच्या तुलनेत नोव्हेंबरमध्ये २,०२,५१० युनिट्सची विक्री केली, जी महिन्याला २४ टक्क्यांची घट दर्शवते.

वार्षिक (Year-on-Year) आकडेवारी मात्र सकारात्मक

मासिक विक्रीत घट झाली असली तरी, वार्षिक स्तरावर (Y-o-Y) चित्र सकारात्मक आहे. महिंद्रासह बहुतेक ओरिजिनल इक्विपमेंट मॅन्युफॅक्चरर्सनी (OEMs) नोव्हेंबर २०२४ च्या तुलनेत वाढ नोंदवली आहे.

महिंद्रा: नोव्हेंबर २०२४ मधील ४६,२२२ युनिट्सच्या तुलनेत यावर्षी ५६,३३६ युनिट्सची विक्री झाली, जी २२ टक्के वाढ आहे.

टोयोटा: 'फॉर्च्युनर' मेकर टोयोटाने गेल्या वर्षीच्या २५,१८३ युनिट्सच्या तुलनेत ५ टक्के वाढीसह २६,४१८ युनिट्सची विक्री नोंदवली.

टीव्हीएस मोटर: दुचाकी विभागात टीव्हीएसने नोव्हेंबर २०२४ मधील ३,०५,३२३ युनिट्सच्या तुलनेत २० टक्के वाढीसह ३,६५,६०८ युनिट्सची विक्री केली.

दुसरीकडे, बजाज ऑटोची देशांतर्गत विक्री मात्र वार्षिक आधारावर १ टक्क्याने घटली आहे. गेल्या वर्षीच्या याच महिन्यातील २,०३,६११ युनिट्सच्या तुलनेत या नोव्हेंबरमध्ये २,०२,५१० युनिट्सची विक्री झाली.