Mumbai Helipad Proposal : वांद्रे–वरळी सी लिंक व कोस्टल रोडसाठी हवाई आपत्कालीन सुविधा आवश्यक - आशिष शेलार

Mumbai Pune Expressway  पुणे- मुंबई एक्सप्रेस वे वर टॅंकर उलटल्यानं झालेल्या वाहतूक कोंडीच्या पार्श्वभूमीवर भाजप नेते ॲड. आशिष शेलार यांनी वांद्रे–वरळी सी लिंक व कोस्टल रोडसाठी हवाई आपत्कालीन सुविधा आवश्यक असल्याबाबत मुख्यमंत्री देवेंद्र फडणवीस यांना निवेदन दिले आहे.

काय म्हटलं आहे निवेदनात ?

पुणे–मुंबई द्रुतगती मार्गावर दोन दिवसांपूर्वी गॅस टँकर उलटून गंभीर आपत्कालीन परिस्थिती निर्माण झाली होती, या पार्श्वभूमीवर भविष्यातील संभाव्य धोके लक्षात घेऊन वांद्रे–वरळी सी लिंक, वर्सोवा–वांद्रे वरळी सी लिंक तसेच संपूर्ण कोस्टल रोडवरील आपत्कालीन व्यवस्थापन अधिक सक्षम करण्याची गरज असून आज यासंदर्भात माननीय मुख्यमंत्री देवेंद्र फडणवीस जी यांना निवेदन दिले.

महत्त्वाच्या मार्गांवर अपघात, आग किंवा नैसर्गिक आपत्ती घडल्यास तातडीने व प्रभावी प्रतिसाद देणे मोठे आव्हान ठरते, विशेषतः कोस्टल रोड हा भुयारी व समुद्रावरून जाणारा मार्ग असल्याने जखमींना त्वरित रुग्णालयात हलवणे, सुरक्षा यंत्रणांची जलद हालचाल आणि आपत्कालीन सेवा पोहोचवणे कठीण होऊ शकते. या पार्श्वभूमीवर वांद्रे रेक्लेमेशन परिसरात, सी लिंकजवळ हेलिपॅड उभारण्याची तातडीची गरज असल्याबाबत देखील निवेदनात मांडले आहे. हेलिपॅड उभारल्यास कोस्टल रोड व सी लिंकवरील आपत्कालीन परिस्थितीत जखमींना एअर अँब्युलन्सद्वारे तातडीने हलवता येईल. तसेच लीलावती रुग्णालयासह परिसरातील अन्य प्रमुख रुग्णालयांपर्यंत जलद सेवा देणे शक्य होईल. यामुळे आपत्ती व्यवस्थापन, पोलीस, अग्निशमन दल, एनडीआरएफ व इतर यंत्रणांमधील समन्वय अधिक प्रभावी होईल आणि मुंबईसारख्या दाट लोकसंख्येच्या आर्थिक राजधानीसाठी दीर्घकालीन आपत्कालीन आराखडा अधिक मजबूत होईल. असं आशिष शेलार यांनी म्हटलं आहे.