बीड बीडमध्ये क्षीरसागर कुटुंबातील काका - पुतण्यातील संघर्ष पुन्हा एकदा पाहायला मिळतोय. विद्यमान आमदार पुतणे संदीप क्षीरसागर हे शहराच्या विकास कामात खोडा घालण्याचं काम करत असल्याचं म्हणत काका क्षीरसागर चांगलेच आक्रमक झालेत.
एकेकाळी भाजपचा बालेकिल्ला मानल्या जाणाऱ्या बीड जिल्ह्यात राष्ट्रवादी काँग्रेसची सध्या एक हाती सत्ता आहे. बीड आणि परळी या दोन विधानसभा मतदारसंघाचा निकाल धक्कादायक लागला, बीडमध्ये पुतण्या संदीप क्षीरसागर यांनी काका जयदत्त क्षीरसागरांचा पराभव करून आपले वर्चस्व सिद्ध केले. यानंतर या दोघांमधला संघर्ष सुरूच आहे. आता काका डॉ.भारतभूषण क्षीरसागर यांच्या ताब्यात असलेल्या नगर परिषदेचा निधी सार्वजनिक बांधकाम विभागाकडे वळवून आमदार संदीप क्षीरसागर यांनी काकांना कोंडीत पकडलं, त्यामुळे भारतभूषण क्षीरसागर चांगलेच संतापले आहेत.
बीड नगर परिषदेचे नगराध्यक्ष डॉ.भारतभूषण क्षीरसागर यांनी पत्रकार परिषद घेऊन आमदार क्षीरसागर शहराच्या विकास कामात कसा अडथळा आणत आहे असं म्हटलं आहे. जिल्ह्यातील इतर नगरपरिषदेला वेगळा न्याय आणि बीड नगरपरिषदेला वेगळा न्याय का? असा सवाल भारतभूषण क्षीरसागर यांनी उपस्थित केला आहे.
दरम्यान या पत्रकार परिषदेत नगरसेवक योगेश क्षीरसागर यांनी आपले चुलत बंधू संदीप क्षीरसागर यांनी शहरासह ग्रामीण भागाचा कशी वाट लावली, याचा व्हिडिओ दाखवून त्यांच्या कामाची पोलखोल केली आहे. येणाऱ्या काळात प्रलंबित प्रश्न मार्गी न लागल्यास नगरपरिषदेच्या नगरसेवकांना घेऊन आंदोलन छेडण्याचा इशारा देखील त्यांनी यावेळी दिली.
दरम्यान काका-पुतण्याच्या वादात बीडच्या जनतेस वेठीस धरण्याचं काम सुरू असल्याचा आरोप स्थानिक नागरिकांकडून केला जातो आहे. दोघांच्या वादात जनतेच्या विकासाचा निधी पळवला असल्याचं देखील आता नागरिक बोलू लागलेत.
दरम्यान याविषयी संदीप क्षीरसागर यांनी बोलणं टाळलं आहे. प्रत्येक वेळी राजकीय कुरघोडी करणाऱ्या काकांवर यावेळी पुतण्याने कुरघोडी केली. नगर परिषदेचा निधी त्यांनी पळवल्याचा आरोप केल्याने बीडचं राजकारण चांगलेच तापले, मात्र याचा नाहक फटका बीडच्या जनतेला सहन करावा लागतोय. एवढेच नाही तर काका पुतण्याच्या वादामुळे आता कार्यकर्ते देखील पुरते वैतागल्याचं पाहायला मिळतंय.