केंद्रात सत्तेत असलेल्या भाजप सरकारची तळी उचलणारे चॅनेल म्हणून काही न्यूज चॅनेल्सवर सातत्याने टीका केली जाते. याच पार्श्वभूमीवर सोमवारी सकाळपासून "#गोदी_मीडिया_दलाली_बंद_करो" हा हॅशटॅग ट्रेंडिंगमध्ये आहे. पंजाबमध्ये पंतप्रधान नरेंद्र मोदी यांच्या सुरक्षेबाबत जो प्रकार घडला त्यानंतर राजकीय आरोप – प्रत्यारोप सुरू झाले आहेत. या पार्श्वभूमीवर काही न्यूज चॅनेल्सनी हा पंतप्रधान मोदी यांच्याविरोधात कट असल्याचा दावा करणारे वृत्त दिले आहे. त्यावरुन आता ट्विटर युजर्सने पंजाबला बदनाम करणाच्या डाव असल्याचा आरोप करत गोदी मीडियावर जोरदार टीका केली आहे.
कमल कौर या ट्विटर युजरने काही न्यूज चॅनेल्सवरील वृत्तांचे फोटो एकत्रित करत जोरदार टीका केली आहे. "जवळपास २४ राष्ट्रीय आणि प्रादेशिक न्यूज चॅनेल्स एकतर्फी पत्रकारीता, सामाजिक द्वेष पसरवणारी पत्रकारिता करत आहेत. या चॅनेल्सचे पत्रकार आणि अँकर्स सातत्याने द्वेष पसरवणाऱ्या फेक न्यूज देत असतात" असा आरोप केला आहे.
MKB या आंदोलक शेतकऱ्यांना पाठिंबा देणाऱ्या ट्विटर युजरने गोदी मीडियावर जोरदार टीका केली आहे. जागतिक पातळीवरील मीडिया जेव्हा शेतकरी आंदोलनाची दखल घेऊन त्यांचे कौतुक करत होता तेव्हा, गोदी मीडियाने अन्नदात्याची प्रतिमा मलीन करण्याचे काम केले अशी टीका केली आहे. यामध्ये त्याने झी न्यूजचे सुझीर चौधरी, सुशांत सिन्हा, झी न्यूज, आज तक यांना टॅग केले आहे.