अशोक चव्हाणांचा भाजपमध्ये पक्षप्रवेश झाल्यानंतर त्यांना वेलकम गिफ्ट दिलंय. राज्यसभा निवडणुकीसाठी भाजपने महाराष्ट्रातून अशोक चव्हाण, मेधा कुलकर्णी आणि अजित गोपछडे यांना उमेदवारी दिली आहे, तर गुजरातमधून जे. पी. नड्डा, गोविंदभाई ढोलकीया, मयंकभाई नायक आणि जशवंतसिंह परमार यांना उमेदवारी दिली आहे. महाराष्ट्रातून आता नारायण राणे यांचा भाजपने पत्ता कट केला आहे, अशी चर्चा आता सर्वत्र सुरू आहे, तर शिंदे गटाकडून मिलिंद देवरा यांना उमेदवारी जाहीर झाली आहे. त्यामुळे आता राज्यसभेची निवडणूक (Rajya Sabha Elections 2024) बिनविरोध होणार का? असा सवाल विचारला जातोय.
काँग्रेसकडून जाहीर झालेले उमेदवार
त्याचबरोबर, काँग्रेसकडून देखील राज्यसभा निवडणुकीसाठी उमेदवारांची यादी जाहीर करण्यात आली आहे. महाराष्ट्रातून काँग्रेससाठी (Maharashtra Congress) चंद्रकांत हांडोरे (Chandrakant Handore),राजस्थानमधून सोनिया गांधी, बिहारमधून आखिलेश सिंह आणि हिमाचल प्रदेशमधून अभिषेक सिंघवी यांना राज्यसभेच्या रिंगणात उतरवण्यात आलं असून अजित पवार गट, उद्धव ठाकरे गट आणि शरद पवार गट कोणाला उमेदवारी देणार? हे पाहणं महत्त्वाचं ठरेल. एवढंच नाही तर निवडणूक बिनविरोध होण्यासाठी बैठकांचा सपाटा देखील लागू शकतो.
तर...महाविकास आघाडीच्या पदरात भोपळा पडू शकतो
काँग्रेसचे १५ आमदार राज्यसभेच्या निवडणुकीत पक्षाच्या अधिकृत उमेदवाराविरोधात क्रॉस व्होटिंग करू शकतात. तसं झाल्यास हंडोरेंचा पराभव होऊ शकतो. जून २०२२ मध्ये भाजपनं अशीच खेळी केली होती. महाविकास आघाडीची मतं फुटली होती आणि भाजपचे धनंजय महाडिक विजयी झाले होते. त्या निवडणुकीत शिवसेना, राष्ट्रवादी आणि काँग्रेसचा प्रत्येकी एक उमेदवार विजयी झाला होता. आता भाजपची खेळी यशस्वी झाल्यास भाजपचा चौथा उमेदवार विजयी होईल. शिंदेंची शिवसेना आणि अजित पवारांच्या राष्ट्रवादीचे एक-एक उमेदवार विजयी झाल्यास महाविकास आघाडीच्या पदरात भोपळा पडू शकतो.