आदिवासी भागातील युवकाची UPSC मध्ये भरारी; हेमकृष्ण पिसदे यांची IRS पदासाठी निवड निश्चित

गोंदिया जिल्ह्यातील देवरी तालुक्यातील आदिवासी बहुल चिचेवाडा गावातील हेमकृष्ण पिसदे यांनी UPSC परीक्षा उत्तीर्ण करत उल्लेखनीय यश मिळवले आहे. त्यांच्या या यशामुळे संपूर्ण परिसरात आनंदाचे वातावरण निर्माण झाले असून, गावी परतल्यानंतर ग्रामस्थांनी त्यांचे उत्साहात स्वागत केले.

अत्यंत साध्या कुटुंबातून पुढे आलेल्या हेमकृष्ण पिसदे यांचा प्रवास अनेकांसाठी प्रेरणादायी ठरत आहे. त्यांचे प्राथमिक शिक्षण चिचेवाडा येथील जिल्हा परिषद शाळेत झाले, तर बारावीपर्यंतचे शिक्षण देवरी येथे पूर्ण केले. पुढील शिक्षण आणि UPSCची तयारी करण्यासाठी त्यांनी पुण्याकडे धाव घेतली.

आर्थिक अडचणी आणि शैक्षणिक आव्हानांचा सामना करत त्यांनी चिकाटीने अभ्यास सुरू ठेवला. सुरुवातीच्या प्रयत्नांत अपयश आले, मात्र त्यांनी हार न मानता पुन्हा जोमाने तयारी केली. दरम्यान, MPSC परीक्षेत यश मिळवत त्यांनी कामगार अधिकारी आणि त्यानंतर तहसीलदार पद मिळवले.

नोकरी करत असतानाही UPSCची तयारी सुरू ठेवत त्यांनी यंदा AIR 849 रँक मिळवली असून IRS पदासाठी त्यांची निवड निश्चित झाली आहे. हेमकृष्ण यांनी आपल्या यशाचे श्रेय आई-वडील, शिक्षक आणि मित्रपरिवाराला दिले आहे.

त्यांच्या या यशामुळे आदिवासी भागातील विद्यार्थ्यांसाठी नवा आदर्श निर्माण झाला असून, जिद्द आणि मेहनतीच्या जोरावर कोणतेही स्वप्न साकार करता येते, हे त्यांनी दाखवून दिले आहे.