Shiv Jayanti : शिवाजी कोण होता ?
शिवाजी कोण होता? या पुस्तकात काय आहे? कॉमरेड गोविंद पानसरे यांच्या मांडणीसंदर्भात मेघा पानसरे यांची मुलाखत पुनःप्रकाशित करत आहोत.
Who was Shivaji? शिवाजी कोण होता? या ७० पानी पुस्तकामुळे २०१५ साली कॉमरेड गोविंद पानसरे यांची हत्या झाली. (दिनांक - १८ फेब्रुवारी २०२४) कॉ. गोविंद पानसरे यांच्या कुटुंबियांकडून मुंबई उच्च न्यायालयात प्रतिज्ञापत्र दाखल करण्यात आले होते. या प्रतिज्ञापत्रात २००० साली प्रसिद्ध झालेल्या 'शिवाजी कोण होता?' Who was Shivaji? या ७० पानी पुस्तकाचा संदर्भ देण्यात आला होता. या पुस्तकात कॉम्रेड पानसरे यांनी 'शिवाजी हिंदू राजा होता, मात्र हिंदू राष्ट्र बनवण्याची शिवाजीची कधीही इच्छा नव्हती', असे लिहिले होते. याच उल्लेखावरून पानसरेंची हत्या झाली, असा खळबळजनक दावा प्रतिज्ञापत्रातून करण्यात आला होता. यासंदर्भात कॉ. गोविंद पानसरेंच्या स्नुषा मेघा पानसरे यांच्याशी बातचीत केली होती, ती मुलाखत मॅक्स महाराष्ट्रवर पुनःप्रकाशित करत आहोत.
काय म्हणाल्या मेघा पानसरे?
आज देशामध्ये जे वातावरण आहे त्यामध्ये धर्मनिरपेक्षतेला एक आव्हान हिंदुत्ववादी लोकांकडून निर्माण झालेलं दिसतं. डॉ. नरेंद्र दाभोळकर यांच्या हत्येनंतर आपण खूनांची मालिका पाहिली. कॉमरेड गोविंद पानसरे यांचं जे पुस्तक आहे शिवाजी कोण होता ? त्यांचं एक व्याख्यान होतं त्यावर आधारित हे ७० पानी पुस्तक पानसरे यांनी तयार केलं होतं. पानसरे यांनी अभ्यास करून त्यांची एक मांडणी समाजापुढे ठेवली. विशेषत: जेव्हा शिवाजी महाराजांना हिंदू धर्माचे रक्षक म्हणून पोर्टेट केलं जात होतं. अशा काळामध्ये कॉमरेड पानसरे यांनी पुस्तकातून मांडणी केली की, त्या काळातील तत्कालीन समाजामध्ये तेव्हा राजेशाही अस्तित्वात होती. त्या काळामध्ये शिवाजी महाराज आणि औरंगजेब आणि निजामशाही होती त्यांच्यातील वादावर पानसरेंनी मांडणी केली होती.
शिवाजी महाराज यांना एक हिंदू राजा म्हणून आणि ज्यांना हिंदुराष्ट्र घडवायचं होतं अशी त्यांची प्रतिमा तयार केली गेली. ती वस्तुस्थिती नसून त्याऐवजी संपूर्ण इतिहासाकडे आपण एका विवेकवादी चष्म्यामधून बघितले पाहिजे. तेथील तपशील समजून घेतले पाहिजे अशा प्रकारची मांडणी या पुस्तकामध्ये असल्याच मेघा पानसरे यांनी सांगतीले. पाहा व्हिडिओ