आंतरराष्ट्रीय स्तरावर गौरवलेला 'द रॅबिट हाऊस' ओटीटीवर प्रदर्शित

२१ आंतरराष्ट्रीय पुरस्कारांनी गौरवलेला बहुप्रतिक्षित हिंदी चित्रपट 'द रॅबिट हाऊस' आता ओटीटीवर जगभरातील प्रेक्षकांसाठी मोफत उपलब्ध झाला आहे. भारत सरकारच्या; अर्थात प्रसार भारतीच्या वेव्स ओटीटी प्लॅटफॉर्मवर हा चित्रपट आता सर्वांना पाहता येणार आहे.

हिमाचल प्रदेशातील अत्यंत अस्पर्शित आणि दुर्मीळ लोकेशन्सवर या चित्रपटाचं चित्रीकरण करण्यात आलं आहे. मानवी नातेसंबंध, मानसिक गुंतागुंत आणि अंतर्मनातील संघर्ष यांवर सूक्ष्म आणि प्रभावी भाष्य करणारा हा सिनेमा आहे.

चित्रपटाची कथा एका नवविवाहित जोडप्याभोवती फिरते. हनिमूनसाठी हिमाचल प्रदेशात गेलेलं हे जोडपं जेव्हा एका "रॅबिट हाऊस" नावाच्या जुन्या, रहस्यमय घरात वास्तव्य करतं, तेव्हा नववधूला हळूहळू तिच्या नवऱ्याच्या स्वभावात काहीतरी अस्वस्थ करणारी गोष्ट जाणवू लागते. तिच्या स्वप्नाळू, मोरपंखी दिवसांची कशी राखरांगोळी होते, आणि त्या प्रक्रियेत ते निर्जीव घरच कसं कथेतलं एक महत्त्वाचं पात्र ठरतं, हे चित्रपटात अत्यंत रंजक पद्धतीने उलगडत जातं.

चित्रपटात ओसीडीग्रस्त (Obsessive Compulsive Disorder) पात्राचं चित्रण करताना, एखादी विक्षिप्त किंवा मानसिकदृष्ट्या अस्थिर व्यक्ती आपल्या आयुष्यात आली, तर आयुष्य कसं उद्ध्वस्त होऊ शकतं, याचं अत्यंत संवेदनशील दर्शन घडवलं आहे.

चित्रपटाचे लेखक आणि दिग्दर्शक वैभव कुलकर्णी म्हणतात,

"हा चित्रपट पाहणारा प्रत्येक जण स्वतःला कुठल्या ना कुठल्या पात्रात पाहतो. तो प्रेक्षकाला आत्मपरीक्षण करायला भाग पाडतो. मनोरंजन करतानाच तो एक कलाकृती म्हणून प्रेक्षकांशी संवाद साधतो आणि अंतर्मुख होण्याची संधी देतो."

द रॅबिट हाऊसचं आणखी एक वैशिष्ट्य म्हणजे त्याची मल्टी-जॉनर रचना. मिस्टरी, ड्रामा आणि रोमॅस या वेगवेगळ्या प्रवाहांना स्पर्श करत ही कथा नकळतपणे प्रेक्षकाला अनपेक्षित धक्के देत पुढे जाते.

संगीत : लोकपरंपरा आणि भावविश्व यांचा सुरेल संवाद

द रॅबिट हाऊस या चित्रपटाचं संगीत ही त्याची आणखी एक महत्त्वाची ताकद आहे. या चित्रपटात हिमाचल प्रदेशच्या लोकसंगीताचा प्रामाणिक आणि सर्जनशील वापर करण्यात आला असून, संगीत हे केवळ पार्श्वभूमीपुरतं न राहता कथानकाचा अविभाज्य भाग ठरतं.

चित्रपटाचे संगीतदिग्दर्शन प‌द्मनाभ गायकवाड यांनी केलं असून, त्यांनी कथानकाच्या भावविश्वाशी सुसंगत असा सुरेल आणि संवेदनशील संगीतप्रवास घडवला आहे. लोकपरंपरेतील ताल, नाद आणि शब्दसंपदा यांचा आधुनिक सिनेमॅटिक संवेदनांशी मेळ घालत संगीत रचण्यात आलं आहे.

या चित्रपटातील गाण्यांना राष्ट्रीय पुरस्कार विजेते गायक पापोन, तसेच आनंदी जोशी यांचा आवाज लाभला असून, त्यांच्या गायनामुळे गाण्यांना भावनिक खोली आणि आत्मीयता मिळाली आहे. विशेषतः हिमाचल

प्रदेशातील कुल्वी नाटी, लोकधून आणि पारंपरिक गीतरचना यांचा वापर चित्रपटाच्या सांस्कृतिक मुळांना अधिक भक्कम करतो.

लोकसंगीत, शास्त्रीय जाण आणि आधुनिक मांडणी यांचा संगम साधत, द रेंबिट हाऊसचं संगीत प्रेक्षकांना केवळ ऐकायला नाही, तर अनुभवायला भाग पाडतं.

या चित्रपटाचे लेखन आणि दिग्दर्शन वैभव कुलकर्णी यांनी केले असून, निर्माल्या सुनीता पांढरे, कार्यकारी निर्माते कृष्णा पांढरे आहेत. संगीत दिग्दर्शन आणि प्रमुख भूमिका प‌द्मनाभ गायकवाड यांनी साकारली आहे. सिनेमॅटोग्राफी प्रतीक पाठक, मेकअप आर्ट व एक महत्त्वाची भूमिका सुरेश कुंभार, तर वेशभूषा प्रणोती पाठक यांनी केली आहे.

इतर प्रमुख कलाकारांमध्ये करिष्मा, अमित रियान, गगन प्रदीप, प्रीती शर्मा, पूर्वा, सुजाता मोगल, योगेश कुलकर्णी यांचा समावेश आहे.

या चित्रपटातून हिमाचल प्रदेशची संस्कृती, खाद्यसंस्कृती, वेशभूषा, लोकसंगीत आणि लोककला यांचा अनुभव प्रेक्षकांना मिळतो.

३ जानेवारी २०२५ रोजी हा चित्रपट भारतभर चित्रपटगृहात प्रदर्शित झाला होता. मात्र ओटीटी प्रेक्षक त्याच्या डिजिटल रिलीजची आतुरतेने वाट पाहत होते. याब‌द्दल समाजमाध्यमांमध्ये सातत्याने विचारणा होत होती. अखेर आता, जवळपास एका वर्षानंतर, द रेबिट हाऊस जगभरातील प्रेक्षकांसाठी मोफत उपलब्ध झाल्याने चाहत्यांमध्ये आनंदाचं वातावरण आहे.