Madha|अंजनगावात पुतळ्यावरून वाद चिघळला; लक्ष्मण हाके यांचा ठिय्या आंदोलन तिसऱ्या दिवशीही सुरू

माढा | सोलापूर जिल्ह्यातील माढा तालुक्यातल्या अंजनगाव खेळोबा येथे महापुरुषांच्या पुतळ्यावरून सुरू झालेला वाद अधिकच तीव्र झाला असून आंदोलनाला आता तिसरा दिवस लागला आहे. ओबीसी नेते लक्ष्मण हाके यांनी अंजनगावा गावाला भेट देत रस्त्यावर ठिय्या आंदोलन सुरू केले आहे.

लक्ष्मण हाके यांनी स्पष्ट भूमिका घेतली आहे की, संबंधित पुतळा शासकीय जागेत स्थलांतरित केल्याशिवाय आंदोलन मागे घेतले जाणार नाही. काल रात्रभर हाके आणि आंदोलकांनी रस्त्यावरच ठिय्या देत रात्र जागून काढली. अनेक आंदोलनकर्ते रस्त्यावरच झोपल्याचेही चित्र पाहायला मिळाले.

दरम्यान, या प्रकरणात खेळोबा मंदिराचे ट्रस्टी आणि दुसरा गट यांच्यात वाद निर्माण झाला आहे. ट्रस्टींचा दावा आहे की, पुतळा त्यांच्या जागेत बसवण्यात आला आहे, तर दुसऱ्या गटाचा आरोप आहे की ती जागा शासकीय आहे.

गेल्या दोन दिवसांपासून पोलीस प्रशासनाकडून बैठका घेण्यात येत असल्या तरी अद्याप तोडगा निघालेला नाही. त्यामुळे गावात तणावपूर्ण वातावरण निर्माण झाले आहे. परिस्थिती नियंत्रणात ठेवण्यासाठी मोठ्या प्रमाणात पोलीस बंदोबस्त तैनात करण्यात आला असून आंदोलनस्थळी दोन्ही बाजूंनी बॅरिकेडिंग करण्यात आले आहे.