मुलुंड मेट्रोच्या सिव्हीलचं कंत्राट अनिल अंबानींच्या कंपनीकडे, कारवाई मात्र सब कॉन्ट्रॅक्टरवरच
मुंबई : ठाणे-वडाळा या मेट्रो ४ च्या मुलुंड इथल्या बांधकामाचा काही भाग चालत्या वाहनांवर पडून झालेल्या दुर्घटनेत एकाचा दुर्देवी मृत्यू झाला असून ३ जण गंभीर जखमी आहेत. याप्रकरणात सरकारनं बांधकाम कंपनीच्या ४ आणि सल्लागार कंपनीच्या एका कर्मचाऱ्याला अटक केलीय. दरम्यान, या मेट्रोच्या सिव्हिल बांधकामाचं कंत्राट हे अनिल अंबानींच्या रिलायंस इंफ्रास्ट्रक्चर लिमिटेड आणि इटलीच्या एस्टाल्डी (RAJV) या कंपनीकडे आहे. त्यामुळं अंबानींच्या नेतृत्वाखालील या कंपनीला सरकार काळ्या यादीत टाकणार का ? असा प्रश्न उपस्थित केला जातोय.
१४ फेब्रुवारी २०२६ रोजी दुपारी साडेबाराच्या सुमारास मुलुंडच्या लालबहादुर शास्त्री मार्गावरील जॉन्सन अँड जॉन्सन कंपनी आणि मुलुंड अग्निशमन दलाच्या केंद्रा दरम्यान मेट्रो ४ चं बांधकाम सुरु आहे. याच बांधकामाचा काही भाग चालत्या वाहनांवर पडून झालेल्या दुर्घटनेत रामधन यादव यांचा मृत्यू झाला. तर अन्य तिघेजण गंभीररित्या जखमी आहेत.
रिलायंस इंफ्रास्ट्रक्चर लिमिटेड आणि इटलीच्या एस्टाल्डी या कंपनीकडे संयुक्तरित्या मेट्रो ४ च्या सिव्हील बांधकामाचं कंत्राट आहे. या कंपन्यांनी सब कॉन्ट्रॅक्टर असलेल्या मिलान रोड बिल्डटेकला सिव्हील बांधकामाच सब कॉन्ट्रॅक्ट दिलेलं आहे. मुलुंडमध्ये ही दुर्घटना घडल्यानंतर प्रशासनानं मिलान रोड बिल्डटेकच्या प्रकल्प संचालक हरीश चौहान, प्रकल्प व्यवस्थापक कुलदीप सपकाळ, उप प्रकल्प व्यवस्थापक सौरभ सिंग आणि सुपरवायझर प्रशांत भोईर यांना अटक केलीय. तर सल्लागार कंपनी हिल इंटरनॅशनल (Hill Internation InC) चे प्रकल्प व्यवस्थापक अवधुत इनामदार यांना अटक केलीय.
मुंबई महानगर प्रदेश विकास प्राधिकरण अर्थात एमएमआरडीए (MMRDA) च्या अधिपत्याखाली मुंबई मेट्रो ४ चं काम सुरु आहे. मुलुंडच्या दुर्घटनेनंतर एमएमआरडीएचे कार्यकारी अभियंता आणि या प्रकल्पाचे प्रमुख सत्यजीत साळवे यांना निलंबित केलंय. एमएमआरडीएनं याप्रकरणाच्या चौकशीसाठी प्रकल्प संचालक बस्वराज भद्रागौंड यांच्या अध्यक्षतेखाली चौकशी समिती नेमलीय. या प्रकल्पासाठी सल्लागार म्हणून काम करणाऱ्या डीबी इंजिनिअरींग अँड कन्सल्टिंग, हिल इंटरनॅशनल आणि लुईस बर्गर कन्सल्टिंग प्रायव्हेट लिमिटेड यांना १ कोटी रुपयांचा दंड लावण्यात आलाय.
याप्रकरणी रिलायंस इन्फ्रास्ट्रक्चर च्या प्रवक्त्यांनी सांगितले की, “ दुर्घटना घडलेल्या जागेच्या बांधकामाचं सब कॉन्ट्रॅक्ट हे मिलान रोड बिल्डटेक एलएलपी (Milan Road Buildtech LLP) या कंपनीला स्थापित करारानुसार देण्यात आलं होतं. या प्रकल्पाचं काम हे रिलायंस इफ्रास्ट्रक्चर लिमिटेड आणि एस्टाल्डी या दोन कंपन्यांना संयुक्तरित्या देण्यात आलेलं आहे. आम्ही एमएमआरडीएसह संबंधित यंत्रणांना याप्रकरणात पूर्ण सहकार्य करत आहोत.
दरम्यान, मुलुंडच्या मेट्रो अपघाताशी संबंधित सब कॉन्ट्रॅक्टरला याच एलबीएस मार्गावच्या दुसऱ्या एका भागात मेट्रो ४ च्या प्रकल्पाच्याच सुरक्षिततेच्या कारणास्तव ठपकाही ठेवण्यात आल्याची माहिती समोर येत आहे. भाजपचे स्थानिक आमदार मिहीर कोटेचा यांनीही मिलान रोड बिल्डटेक एलएलपी या कंपनीवर याधीही कामात हलगर्जीपणाचा ठपका ठेवण्यात आल्याचं म्हटलंय. मेट्रोच्या मुख्य सुरक्षा अधिकाऱ्यांनी सांगितले की, कामगारांनी वेल्डिंग आणि सुरक्षित करण्याऐवजी चुकून पॅरापेटची भिंत कापली. मानक कार्यप्रणाली (Standard operating procedure – SoP) नुसार अशाप्रकारचे महत्त्वाचे काम करतांना ते निगराणीखालीच व्हायला पाहिजे. मात्र, याठिकाणी कुठलाही सुपरवायझर उपस्थित नव्हता. त्यामुळं कमकुवत असलेलं बांधकाम ११ तासांनी कोसळले, अशी माहिती आमदार मिहीर कोटेचा यांनी दिली. या मार्गावरील २ किलोमीटरच्या बांधकामाची आमदार कोटेचा यांनी एमएमआरडीएचे अधिकारी आणि नागरिकांसोबत नुकतीच पाहणी केली होती. त्यावेळी ५५ पेक्षा अधिक ठिकाणी अक्षम्य दुर्लक्ष होत असल्याचं आढळलं. या सर्वांचे १०० पेक्षा अधिक GIS टॅग केलेले फोटोग्राफ्स ही त्यांच्याकडे असून संबंधित कंत्राटदाराविरोधात कारवाईची मागणी आमदार कोटेचा हिवाळी अधिवेशनात केली होती.
या विकास प्रकल्पांमुळे होणारं वायुप्रदुषण, अरुंद झालेले रस्ते, कंत्राटदार कंपन्यांकडून सुरक्षेत होणारा हलगर्जीपणा याविरोधात मुलुंडच्या घटनेनंतर मुंबईकरांमध्ये संतापाची लाट उसळल्याचं चित्र शनिवारी बघायला मिळालं. मुंबईसारख्या महानगरामध्ये कोट्यवधी रुपये खर्चून केल्या जाणाऱ्या विकास प्रकल्पांमध्ये कंत्राटदारांकडून होणाऱ्या हलगर्जीपणाविरोधात सोशल मीडियावरही नेटिझन्सनी संताप व्यक्त केलाय.