मराठवाड्यात कोरोनाची परिस्थिती गंभीर, विभागीय आयुक्तांची Audio क्लिप व्हायरल

औरंगाबादमध्ये झालेल्या विभागीय बैठकीत, कोरोनाला नागरीक गांभीर्याने घेत नसल्याने आकडा पुन्हा वाढत आहे, त्यामुळे पुढेही असेच सुरू असल्यास कठोर निर्णय घ्यावे लागतील, असे उपमुख्यमंत्री अजित पवार म्हणाले होते.  आता मराठवाड्यातील कोरोना परिस्थितीबाबत विभागीय आयुक्त सुनील केंद्रेकर यांची ऑडिओ क्लिप व्हायरल झाली आहे. यात मराठवाड्यात कोरोनाबाबतची  परिस्थिती गंभीर असल्याचे केंद्रेकर म्हणत आहेत. 

या क्लिपमध्ये बोलताना सुनील केंद्रेकर, औरंगाबाद, बीड, परभणी येथे मोठी मोठी लग्न होत आहे, मात्र प्रशासनाचा त्यावर कसलाही लगाम नाही असं स्पष्टपणे सांगत आहेत, त्यामुळे तात्काळ मंगल कार्यालयांवर कारवाई करा, त्यांना नोटीस बजावा आणि प्रसंगी ते सील करून गुन्हे दाखल करा, अशा प्रकारच्या सूचना त्यांनी दिल्या आहेत. परभणी आणि नांदेडमध्ये कॉन्टॅक्ट ट्रेसिंग व्यवस्थित होत नाहीये आणि वारंवार सूचना देऊनही फरक पडत नाही, अशी नाराजी त्यांनी व्यक्त केली आहे.   कॉन्टॅक्ट ट्रेसिंग वाढवावी अशा प्रकारच्या सूचनाही केंद्रेकर यांनी दिल्या आहेत. 

लातूर, बीड, परभणी ,औरंगाबाद या ठिकाणची खरंच गंभीर आहे. परिस्थिती भयानक आहे त्यामुळे जिल्हाधिकाऱ्यांनी, महापालिका आयुक्तांनी पुढाकार घेऊन या सगळ्या गोष्टी ताबडतोब सुरू कराव्या ,पुन्हा पुन्हा टेस्टिंग वाढवा, कॉन्टक्ट ट्रेसिंग करा हे सांगण्याची वेळ येऊ नये, असेही केंद्रेकर यांनी बजावले आहे. 

सोबतच रुग्ण आढळल्यास किमान ज्या घरात रुग्ण आढळला ते घर सील करा, तो रुग्ण बाहेर फिरणार नाही याची काळजी घ्या आणि डॉक्टरांकडे लोक ताप-सर्दी थंडीसाठी गेले असतील तर डॉक्टरांनाही त्यांच्या टेस्ट करण्याच्या सूचना करा अन्यथा कारवाई करा अशा पद्धतीचे आदेश केंद्रेकर यांनी दिले आहेत.  विभागीय आयुक्तांच्या या व्हायरल क्लिप वरून मराठवाड्यात कोरोना बाबत परिस्थिती गंभीर होत असल्याचे मात्र स्पष्ट होत आहे.

मंगळवारी मराठवाड्यात २७१ कोरोनाबाधित

मंगळवारी मराठवाड्यात २७१ कोरोनाबाधित रुग्णांची वाढ झाली आहे. यात औरंगाबादेत पुन्हा कोरोना रुग्णांची वाढ झाली असून तब्बल १२० बाधित रुग्ण आढळले आहेत. नांदेड जिल्ह्यात २१,बीड व लातूर जिल्ह्यात प्रत्येकी १९, जालना जिल्ह्यात ५५, उस्मानाबाद जिल्ह्यात १२ आणि हिंगोली जिल्ह्यात १० कोरोना बाधित रुग्णांची भर पडली आहे. दरम्यान, जालना जिल्ह्यात आणि बीड जिल्ह्यात प्रत्येकी एका कोरोनाबाधित रुग्णाचा मृत्यू झाला.