एकनाथ शिंदे यांच्यासह शिवसेनेच्या ४० आमदारांनी बंड केल्यानंतर उद्धव ठाकरे यांना मोठा धक्का बसला आहे. याच पार्श्वभूमीवर राज्यातील अनेक भागातील शिवसैनिक आणि नेत्यांनीही एकनाथ शिंदे गटाचे समर्थन केले आहे. तर दुसरीकडे शिवसेनेच्या एका बड्या नेत्याने आपला पदाचा राजीनामा देत उद्धव ठाकरे यांच्यावरील नाराजी व्यक्त केली आहे.
माजी मंत्री आणि शिवसेनेचे ज्येष्ठ नेते रामदास कदम यांनी आपल्या नेते पदाचा राजीनामा दिला आहे. त्यांनी पक्षप्रमुख उद्धव ठाकरे यांना पत्र लिहून आपली भूमिका स्पष्ट केली आहे. त्यांनी आपल्या पत्रात काय म्हटले आहे ते पाहा...
"शिवसेना प्रमुख मा. बाळासाहेब ठाकरे पांनी माझी शिवसेना नेते पदी नियुक्ती केली होती. मात्र, शिवसेना प्रमुखांचे निधन झाल्यानंतर नेते पदाला कुठलीही किंमत राहीली नाही, हे मला पहायला मिळालं.
आपण मुख्यमंत्री झाल्यानंतर आपल्या व्यस्त कार्यक्रमामधून शिवसेना नेत्यांना विश्वासात घेण्याचं काम आपल्याकडून कधीच झालं नाही. उलटपक्षी मला व माझा मुलगा आमदार योगेश रामदास कदम याला अनेक वेळा अपमानीत करण्यात आले.
विधानसभेच्या निवडणूकीच्या आधी आपण मला आचानक मातोश्रीत बोलवून घेतले आणि मला आदेश दिलेत की यापुढे तुमच्यावरती कोणीही कितीही टिका केली किंवा पक्षावर काही बोलले किंवा मातोश्रीवर कोण काही बोललं तरी आपण मिडीयासमोर अजिबात जायचे नाही. मिडीयासमोर कुठलेही वक्तव्य करायचे नाही, यामागचं कारण मला आजपर्यंत कळू शकलं नाही. मागील ३ वर्षापासून तोंड दाबून बुक्क्यांचा मार मी सहन करित आहे. ज्या ज्या वेळी शिवसेनेवरती संकटे आली त्या वाईट काळामध्ये माझा संघर्ष उभ्या महाराष्ट्राने पाहिला आहे व महाराष्ट्रातला प्रत्येक शिवसैनिक याचा साक्षीदार आहे.
२०१९ साली आपण राष्ट्रवादी आणि काँग्रेस सोबत सरकार बनवत होतात त्याही वेळी मी आपल्याला हात जोडून विनंती केली होती की, शिवसेना प्रमुख मा. बाळासाहेब ठाकरे यांनी आयुष्यभर राष्ट्रवादी व काँग्रेस सोबत संघर्ष केला व हिंदुत्व टिकवलं. राष्ट्रवादी व काँग्रेस सोबत युती करु नका, ती बाळासाहेबांच्या विचाराची प्रतारणा होईल. अशी आपल्याला विनंती केली होती. पण आपण त्याहीवेळी माझं ऐकलं नाही याचेही दुःख माझ्या मनामध्ये आहे. शिवसेना प्रमुख असते तर माझ्यावर ही वेळ आली नसती आणि म्हणून मी आज "शिवसेना नेता " या पदाचा राजीनामा देत आहे.
अशी स्पष्ट नाराजी व्यक्त करत त्यांनी आपला राजीनामा दिला आहे. पण आता रामदास कदम एकनाथ शिंदे गटात जाणार की उद्धव ठाकरे यांच्यासोबतच राहणार हे मात्र स्पष्ट झालेले नाही.