राज्यसभा निवडणूकः राजस्थानमध्ये भाजप आमदाराचं काँग्रेसला मतदान

राज्यसभा निवडणुकीत भाजपला राजस्थानमध्ये धक्का बसला आहे. राजस्थानमध्ये कांग्रेसचे तिन्ही उमेदवार विजयी झाले आहेत. भाजपच्या पाठिंब्याने मैदानात उतरलेले अपक्ष उमेदवार सुभाष चंद्रा यांचा पराभव झाला आहे. राजस्थानमध्ये चार जागांसाठी मतदान पार पडले. मात्र, मैदानात पाच उमेदवार उतरल्याने राज्यसभेची ही निवडणूक रंगतदार ठरली होती.

राज्यस्थानमध्ये सुभाष चंद्रा हे अपक्ष उमेदवार म्हणून मैदानात उतरले होते. त्यांना भाजप आणि आरएलपीच्या ३ आमदारांनी पाठिंबा दिला होता. २०० जागा असलेल्या राजस्थान विधानसभेत भाजपचे एकूण ७१ आमदार आहेत. २०० सदस्य संख्या असलेल्या राजस्थान विधानसभेच्या सदस्य संख्येनुसार राज्यसभेच्या उमेदवारास निवडून येण्यासाठी आवश्यक असलेल्या ३८ मतांव्यतिरिक्त उरलेली ३३ मतं भाजपने सुभाष चंद्रा यांच्या बाजूनं टाकली होती. मात्र, त्यांना जिंकण्यासाठी आवश्यक असलेल्या मतांचा कोटा पूर्ण न करू शकल्याने त्यांचा पराभव झाला.

काँग्रेस विजय उमेदवार

मुकुल वासनिक,

रणदीप सिंह सुरजेवाला

आणि

प्रमोद तिवारी

भाजप विजयी उमेदवार

घनश्याम तिवाडी

दरम्यान भाजपच्या आमदार शोभाराणी कुशावाह यांनी काँग्रेस उमेदवार प्रमोद तिवाडी यांना मतदान केले. त्यामुळे राजकीय वर्तुळात मोठी चर्चा सुरू आहे. भाजप नेत्यांनी त्यांच्या विरोधात पक्ष श्रेष्ठींकडे तक्रार केली आहे. त्या वसुंधरा राजे यांच्या जवळच्या असल्याचं मानलं जाते.