Gandhi Talks film review : गांधी टॉक्स... नव्हे गांधी रॉक्स.!!

Silent film creating buzz in Indian cinema  "किशोर पांडुरंग बेळेकर 'बोलतात'...गांधी टॉक्स"

गांधी टॉक्स.. नव्हे गांधी रॉक्स.!!

खरं तर या टॉक्स म्हणजे गांधींच्या बोलण्याच्या नावाने काढलेल्या शब्दशः निःशब्द चित्रपटाने माझी तर बोलतीच बंद झाली आहे. गांधीजींच्या आयुष्याचा या सिनेमाशी काहीही संबंध नसला तरी गांधीजींनी त्यांच्या अंतापर्यंत परिधान केलेल्या सत्य आणि स्वच्छ चारित्र्य या तत्वांवर हा सिनेमा आहे.

भारतीय सिनेमाने दुसऱ्यांदा एक बोलका नसलेला पण आपल्या अंतक्षूंमध्ये प्रचंड कोलाहल माजवणारा एक सुरेख चित्रपट दिला आहे. जवळपास तीस वर्षांनंतर 'पुष्पक' या संगीतम श्रीनिवास राव (नाव खणखणीत लक्षात आहे. गुगलमध्ये पाहण्याची गरज भासली नाही.) यांच्या अनोख्या यशस्वी प्रयोगानंतर दुसऱ्यांदा तेही 'किशोर पांडुरंग बेळेकर' असे अगदी मराठमोळे नाव असलेल्या मराठी दिग्दर्शकाने हा नवा प्रयोग अफाट केला आहे. फक्त पुष्पक या सिनेमाला मनोरंजक मूल्ये होती.. गांधी टॉक्स या सिनेमाला सामाजिक संदर्भ आहेत एवढाच पण अत्यंत महत्वाचा निर्णायक फरक आहे.! तीन दक्षिणात्य मोठे कलावंत दोन हिंदी कलावंत आणि तीन मराठी कलावंत असा आठ जबरदस्त प्रमुख कलावंतांच्या जामानाम्यात, सादरीकरणात एक सुंदर मूक कलाकृती जन्माला आली आहे.

मुंबईच्या जुन्या जरठ चाळीत... अठरा विश्वे दारिद्र्यात राहणाऱ्या पण सिद्धांतावर चालणाऱ्या एका सुशिक्षित गरीब गांजलेला, सतत कामाच्या शोधात असणारा एक तरुण आणि भ्रष्ट सिस्टिममुळे त्रासलेला, बरबाद होऊ पाहिलेला एका श्रीमंत दिवाळखोर बिल्डर या दोन परस्परविरोधी व्यक्तिमत्वांची कथा बेळेकरांनी एकमेकांमध्ये काय सुरेख गुंफली आहे. तो गरीब तरुण साकारला आहे, दक्षिणेला मोठा स्टार आणि उत्तम अभिनेता विजय सेतुपती याने.. तर तो श्रीमंत गांजलेला बिल्डर साकारला आहे अरविंद स्वामीसारख्या आणखी एका ज्येष्ठ दक्षिणात्य कलावंताने. दोघांनीही आपापल्या भूमिकेत कमाल केली आहे.! उत्कृष्ट अभिनयाचा आणि संवादाचा तसा फारसा काही संबंध असतोच असे नाही हे पुन्हा एकदा अभिनेते कमल हसननंतर या दोघा दक्षिणात्य कलाकारांनी सिद्ध केले आहे.! त्यांच्या खालोखाल अफाट मुकाभिनय केलाय तो आदिती राव हैदरी या अभिनयाची अफाट रेंज असलेल्या अभिनेत्रीने.!

चाळीतल्या सामान्य, गरीब, होनहार महादेव या तरुणावर मूक प्रेम करणारी, त्याचं प्रेम समजणारी... मजबुरी असतानाही त्याच्या आजारी आईची सुश्रुषा करणारी, त्याच्यातला प्रामाणिक प्रियकर जिवंत ठेवू पाहणारी.. तरुण प्रेमिका.!

असंख्य छटा आदिती राव हैदरी हिने अप्रतिम दाखवल्या आहेत.! ती घरच्या दबावामुळे दुसऱ्या मुलासोबत लग्नाला तयार झाल्यानं नाराज झालेला तो तिला रागाने प्रचंड झिडकारत असताना प्रेमानं त्याला घट्ट बिलगू पाहणारी निष्पाप गायत्री पाहून अक्षरशः पोटात तुटते.! हिरामंडी या वेबमालिकेतला अदिती राव हैदरी हिचा अफाट अभिनय हा फ्लूक नव्हता हे तिने पुन्हा एकदा सिद्ध केलं आहे.! सिद्धार्थ जाधव हा मराठीतला ओबडधोबड विनोदी दिसणारा कलावंत म्हणजे अस्सल अभिनयाचा हिरा आहे.. त्यानं पाकिटमार असलेल्या भुरट्या चोराची भूमिका त्याच्या अफाट मुद्राभिनयासह अप्रतिम केली आहे.! या चित्रपटात गांधीजी आणि त्यांच्या तत्त्वांचे या भ्रष्ट सिस्टिममधले महत्व सुरुवातीपासून शेवटपर्यंत नावीन्यपूर्ण पद्धतीनं दाखवले आहे.

सिनेमाचा शेवट तर अंगावर रोमांच आणणारा आहे. एका भिंतीजवळ नायक उभा असतो. भिंतीच्या एका बाजूला सावित्रीबाई फुले, शाहू महाराज तर दुसऱ्या बाजूला भगत सिंह, गांधीजी, आंबेडकर रंगवलेले असतात. भिंत सोडून महादेव थोडा पुढे येतो आणि बरोब्बर मध्ये तलवार पराजून ऍक्शन मध्ये उभे असलेले साक्षात शिवछत्रपती दिसतात आणि अक्षरशः अंगावर रोमांच उभे राहतात. हे दृश्य पाहून तुम्ही जर सिनेमागृहात उभे राहून टाळ्यांचा कडकडाट नाही केला तर मी नाव नाही सांगणार. जणू शिवछत्रपती या दोन्हीकडच्या आदर्शांच्या साक्षीने तलवार पराजून सांगताहेत की, भ्रष्टाचाराच्या विरुद्ध सुरू असलेली लढाई अजूनही संपलेली नाही.! किशोर पांडुरंग बेळेकर हे नाव भारतीय चित्रपटसृष्टीत प्रथमच दिग्दर्शक म्हणून ऐकायला मिळाले असले तरी पुढे दिग्गज दिग्दर्शक म्हणून गाजणार आहे. साधारणतः आशयघन सिनेमांचा शेवट हा आजपर्यंत चटका लावणारा वेदनादायी, शोकांत असाच दाखविला गेला आहे. पण बेळेकरांनी या उत्तम मूकपटाचा शेवट सुखान्त दाखवून वेगळी वाट चोखाळली आहे.. हा हलका फुलका आणि सामाजिक आशयघन सिनेमा जरूर पाहा.!

न बोलता, मोठ्यानं आवाज न करता बरंच काही सांगता येतं. आणि गोष्ट सांगणाऱ्याचं सादरीकरण अफलातून असेल तर शब्दांची गरजच नसते हे प्रेरित होतं.!

Gandhi Talks, Kishor Pandurang Belekar, Vijay Sethupathi, Arvind Swami, Aditi Rao Hydari, Siddharth Jadhav, Indian Silent Film, Experimental Cinema India, Gandhi Principles Movie, Marathi Director Film.