WPI Inflation February 2026 : महागाईचा विळखा घट्ट!

देशातील महागाईचा आलेख पुन्हा एकदा वर चढताना दिसत आहे. सोमवारी सरकारने जाहीर केलेल्या आकडेवारीनुसार, फेब्रुवारी २०२६ मध्ये घाऊक किंमत निर्देशांकावर (WPI) आधारित महागाईचा दर २.१३ टक्क्यांवर पोहोचला आहे. विशेष म्हणजे, महागाईत वाढ होण्याची ही सलग चौथी महिना आहे. प्रामुख्याने अन्नपदार्थ आणि बिगर-अन्न वस्तूंच्या किमती वाढल्यामुळे महागाईने डोके वर काढले आहे.

जानेवारी २०२६ मध्ये घाऊक महागाई १.८१ टक्के होती, तर गेल्या वर्षी फेब्रुवारी २०२५ मध्ये हा दर २.४५ टक्के इतका नोंदवण्यात आला होता.

अन्नपदार्थांनी वाढवली चिंता

अन्नपदार्थांच्या महागाई दरात मोठी वाढ झाली असून, जानेवारीतील १.५५ टक्क्यांच्या तुलनेत फेब्रुवारीत हा दर २.१९ टक्क्यांवर गेला आहे.

काय महागले: डाळी, बटाटा, अंडी, मांस आणि मासे यांच्या किमतीत गेल्या महिन्याच्या तुलनेत वाढ झाली आहे.

काय स्वस्त झाले?

भाजीपाल्याच्या दरात काहीशी घट झाली असून महागाई दर जानेवारीतील ६.७८ टक्क्यांवरून ४.७३ टक्क्यांपर्यंत खाली आला आहे.

वाणिज्य आणि उद्योग मंत्रालयाने दिलेल्या माहितीनुसार, उत्पादित वस्तूंच्या महागाईतही किंचित वाढ होऊन ती २.९२ टक्क्यांवर पोहोचली आहे. बिगर-अन्न गटात (Non-food articles) महागाईचा मोठा भडका उडाला असून हा दर ७.५८ टक्क्यांवरून थेट ८.८० टक्क्यांवर गेला आहे.

दुसरीकडे, इंधन आणि वीज (Fuel and Power) गटात दिलासा कायम असून येथे उणे ३.७८ टक्के महागाई (Deflation) नोंदवण्यात आली आहे.

आरबीआयच्या निर्णयाकडे लक्ष

गेल्या आठवड्यात जाहीर झालेल्या आकडेवारीनुसार, देशातील किरकोळ महागाईचा दरही (Retail Inflation) फेब्रुवारीत वाढून ३.२ टक्क्यांवर पोहोचला आहे. भारतीय रिझर्व्ह बँक (RBI) प्रामुख्याने किरकोळ महागाईचा विचार करून व्याजाचे दर ठरवते. चालू आर्थिक वर्षात आरबीआयने आतापर्यंत व्याजदरात १.२५ टक्क्यांची कपात केली आहे. मात्र, महागाईचा वाढता कल पाहता, आगामी पतधोरण बैठकीत आरबीआय काय भूमिका घेते, याकडे सर्वांचे लक्ष लागले आहे.