राज्यमंत्री बच्चू कडू यांचा स्पष्टवक्तेपणा जगजाहीर आहे. पण सरकारी योजनांमधील दिरंगाईबाबत संतापलेल्या मंत्री बच्चू कडू यांची जीभ घसरल्याचा प्रकार जळगावमध्ये घडला आहे. भुसावळ प्रांत कार्यालयातील आढावा बैठकीत मंत्री बच्चू कडू संतापले आणि त्यांनी कामचुकार असल्याचे सांगत अधिकाऱ्यांचा पाणउतारा केला. "फुकटचा पैसा खायचा, तुम्हाला तर लाथच मारायला पाहिजे," या शब्दात ते अधिकाऱ्यांवर भडकले. राज्य आणि केंद्र सरकारच्या वतीने राबवण्यात येणाऱ्या योजनांचा लाभ गोरगरिबांना मिळत नसल्याने अधिकाऱ्यांना त्यांनी खडेबोल सुनावले. तसेच कामचुकार अधिकाऱ्यांना कारणे दाखवा नोटीस बजावण्याच्या सूचना देखील केल्या.
बच्चू कडू याआधी आमदार असतानाही अधिकाऱ्यांसोबत त्यांचे वाद झालेले आहेत. सामान्यांच्या प्रश्नांवर अधिकाऱ्यांशी वादविवाद, त्यांना मारण्याची धमकी देण्याचे आरोपही बच्चू कडू यांच्य़ावर झालेले आहेत. पण आता ते मंत्री झाल्यानंतर पुन्हा एकदा सामान्यांच्या प्रश्नांवर त्यांनी अधिकाऱ्यांना त्यांच्या स्टाईलने इशारा दिला आहे. आता याचे पडसाद काय उमटतात ते पाहणे महत्त्वाचे ठरणार आहे.