दारु सोडण्याचं औषध दिल्यानं एकाचा मृत्यू, औषध देणारा फरार

जालना : दारूचं व्यसन सोडण्याचं औषध दिल्यानं एका जणाचा मृत्यू झाला आहे. ४० वर्षीय गोपाल दवांडे असं या औषधाचं सेवन केल्यामुळे मृत्युमुखी पडलेल्या व्यक्तीचं नाव असून तो अकोला जिल्हयातील शिसामासा गावचा रहिवासी असल्याची माहिती पोलिसांनी दिली आहे. तर दारूचं व्यसन सोडण्यासाठी औषध देणारा महाराज हा जालन्यातील धावडा गावचा रहिवासी असल्याची माहिती आहे. गोपाल यांचा औषधामुळेच मृत्यू झाल्याच म्हणत मयताच्या नातेवाईकांनी त्यांचा मृतदेह औषध देणाऱ्या महाराजांच्या घरासमोर आणून ठेवल्यानं महाराज फरार झाला आहे.

तडवी बाबा असं फरार झालेल्या महाराजाचे नाव आहे. शिसामासा येथील गोपाल दवांडे यांचं दारूचं व्यसन सोडवण्यासाठी त्यांना काल जालन्यातील धावडा येथील तडवी बाबा या महाराजांकडे आणण्यात आलं होतं. काल या महाराजांनी दारु सोडवण्यासाठी साडेचार हजार रुपये घेऊन त्यांना दोन ग्लास औषध पाजलं. त्यानंतर गोपाल दवांडे हे बेशुध्द अवस्थेत होते. मात्र काल दुपारच्या सुमारास त्यांचा मृत्यू झाल्याचं समोर आलं. दरम्यान या महाराजांवर गुन्हा दाखल करून त्याला तात्काळ अटक करावी अशी मागणी मयताच्या कुटुंबीयांनी केली आहे. या घटनेची माहिती पारध पोलिसांना मिळाल्यानंतर त्यांनी घटनास्थळी धाव घेतली असून पोलीस या प्रकरणी अधिक तपास करत आहे.