कांजूरमार्ग येथील सॅमसंग सर्विस सेंटर येथे भीषण आग; सुदैवाने जीवितहानी नाही

मुंबई :  कांजूरमार्ग येथील सॅमसंग सर्विस सेंटर येथे काल रात्री भीषण आग (Kanjurmarg Fire) लागल्याची घटना समोर आली, या ठिकाणी सॅमसंग सर्व्हिस सेंटरचे गोडाऊन, तसेच घरगुती किराणा मालाचेही गोडाऊन आहे. त्याचबरोबर केटरिंग किचन देखील याठिकाणी आहे आणि शॉर्टसर्किटमुळे केटरिंग किचनमध्ये आग लागली असल्याची प्राथमिक माहिती आहे.

येथील सॅमसंग सर्व्हिस सेंटरमध्ये इलेक्ट्रॉनिक उपकरणे आहेत आणि आग लागल्याने वस्तूंचा स्फोट झाल्यामुळे ही आग भीषण झाली असल्याचे बोलले जात आहे. या ठिकाणी जे कर्मचारी होते त्यांना बाहेर काढण्यात आले आहे. तसेच आजूबाजूला दाटीवाटीच्या परिसर असल्याने अग्निशमन दलाच्या गाड्या जाण्यास अडथळा येत होता. मात्र, या आगीवर नियंत्रण आणण्यासाठी अग्निशमन दलाचे जवानांनी शर्थीचे प्रयत्न केले. सुदैवाने या घटनेत कोणतीही जीवितहानी झालेली नाही.

दरम्यान , राज्यात सध्या आग लागण्याच्या घटनांमध्ये वाढ होताना दिसत आहे. मागील आठवड्यात अहमदनगर जिल्हा रुग्णालयातील आयसीयू विभागाला आग लागली आणि यात ११ रुग्णांचा दुर्दैवी मृत्यू झाला होता. ही घटना ताजी असतानाच कांजूरमार्गमध्ये आग लागली आहे. ही आग अतीशय भीषण होती. या घटनेचा व्हिडिओ सोशल मीडियावर व्हायरल होत आहे.ज्यात आगीचे आणि धुराचे लोट दिसत आहेत.