Aryan Khan प्रकरणी समीर वानखेडे संकटात, चौकशीचे आदेश

शाहरुखानचा मुलगा Aryan Khan याला ड्रग्ज प्रकरणी NCBने क्लिनचीट दिल्यानंतर आता NCBचे प्रमुख Sameer Wankhede यांच्या अडचणी वाढल्या आहेत. क्रुझ ड्रग्ज प्रकरणात समीर वानखेडे यांनी निकृष्ट दर्जाचा तपास केल्याप्रकरणी त्यांच्यावर कारवाई होण्याची शक्यता आहे. NCB ने आर्यन खानसह ६ जणांची नावं आरोपपत्रातून वगळण्याचा निर्णय घेतला. केंद्रीय गृह विभागाने या प्रकरणात सक्षम अधिकाऱ्यांनी समीर वानखेडे यांची चौकशी करण्याचे आदेश दिले आहेत. एएनआयने दिलेल्या वृत्तानुसार NCBच्या आरोपपत्रात आर्यन खानसह ६ जणांना पुराव्या अभावी निर्दोष सोडण्यात आले आहे.

याप्रकरणात आधीच समीर वानखेडे यांच्याविरोधात खोट्या जातप्रमाणपत्र प्रकरणी चौकशी सुरू आहे. त्यात आता या प्रकरणात चौकशी सुरू झाल्याने वानखेडे हे चांगलेच अडचणीत आले आहेत. समीर वानखेडे यांनी खोटे जातप्रमाणपत्रा दिल्याचा आरोप राष्ट्रवादीचे मंत्री नावब मलिक यांनी केला होता. त्यांनी यासंदर्भात पुरावे देखील सादर केले होते. शुक्रवारी NCB चे अधिकारी संजय सिंग यांनी आर्यन खान प्रकरणात समीर वानखेडे यांच्यासह त्यांच्या पथकाने तपासात चुका केल्या आहेत, अशी स्पष्ट कबुली दिली आहे. यामध्ये काही माध्यमांनी सुत्रांच्या हवाल्याने दिलेल्या वृत्तामध्ये समीर वानखेडे यांच्या नेतृत्वाखाली घालण्यात आलेल्या धाडींमध्ये व्हिडीओशूटींग करण्यात आले नाही, आर्यन खानच्या फोनबाबतही चुकीच्या पद्धतीने तपास करण्यात आल्याचे चौकशीत उघड झाल्याचे म्हटले आहे.

याप्रकरणी समीर वानखेडे यांच्याविरोधात आरोप झाल्यानंतर NCBचे उपमहानिदेशक संजय सिंग यांच्याकडे या प्रकरणाचा तपास देण्यात आला होता. आर्यन खानसह ६ जणांना क्लीनचीट देण्यात आल्यानंतर नवाब मलिक यांच्या कार्यालयाने समीर वानखेडे यांच्यावर कारवाईची मागणी केली होती.