भाजपचे नेते किरीट सोमय्या यांनी पोलीस महासंचालक रजनीश शेठ यांची पोलीस महासंचालक कार्यालय येथे जाऊन भेट घेतली. या भेटीत दापोली येथील साई रिसॉर्टचे मालक अनिल परब यांच्या विरोधात फौजदारी कारवाई करण्यासंदर्भात ही भेट घेतली असल्याचे सोमय्या यांनी भेटीनंतर माध्यमांशी बोलताना सांगितलं. “साई रिसॉर्ट हे अनधिकृत आहे, त्याच्यावर कारवाई करावी, असे आदेश पर्यावरण मंत्रालयाने केंद्र सरकार तसेच महाराष्ट्र सागरी किनारा क्षेत्र व्यवस्थापन प्राधिकरणाने रत्नागिरी जिल्हाधिकारी यांना दिले आहेत. यासंदर्भात आम्ही तीन वेळा दापोली पोलीस स्टेशनमध्ये तसेच पोलीस अधीक्षक रत्नागिरी यांच्याकडे तक्रारी केल्या. राज्य सरकारने रिसॉर्टचा एन ए अनधिकृत असून फ्रॉड सर्जरी करून प्राप्त करण्यात आला आहे, असा अहवाल दिला आहे. आम्ही दापोलीतील दोन रिसॉर्ट मालकांविरोधात पोलिसात तक्रार दाखल केली. परंतु साई रिसॉर्टच्या मालकाविरुद्ध अजून पर्यंत तक्रार दाखल झालेली नाही. त्यामुळे ताबडतोब याची दखल घेत तक्रार दाखल करावी आणि कारवाई करावी” अशी आमची मागणी पोलीस महासंचालकांकडे केल्याचे किरीट सोमय्या यांनी सांगितले.