नांदेड: संपुर्ण राज्याचे लक्ष लागलेल्या देगलूर विधानसभा मतदारसंघाच्या (Deglur Assembly Election) पोट निवडणूकीसाठी आज मतदान होत आहे.आज सकाळी सात वाजल्यापासून मतदानाला सुरूवात झाली आहे. काँग्रेसचे आमदार रावसाहेब आंतापूरकर यांच्या निधनानंतर रिक्त जागेसाठी ही पोटनिवडणूक होत आहे. पालकमंत्री अशोक चव्हाणांसाठी ही निवडणूक प्रतिष्ठेची मानली जात आहे. भाजप, (BJP) महाविकास आघाडी, (MVA) वंचितच्या उमेदवारामध्ये या निवडणुकीत चुरस पाहायला मिळत आहे.
निवडणूक प्रक्रीयेत सहभागी असलेले कर्मचारी काल रात्रीच ईव्हीएम मशीन घेऊन वाहनातून मतदान केंद्राकडे मुक्कामी पोहोचले होते. या निवडणूकीत एकूण 12 उमेदवार रिंगणात आहेत. या निवडणुकीत तीन लाख मतदार असून, 412 मतदान केंद्रावर मतदान होत आहे. यापैकी आठ मतदान केंद्र संवेदनशील आहेत. जवळपास 2000 हजार कर्मचारी मतदान प्रक्रियेत कार्यरत असून, कुठलाही अनुसूचित प्रकार घडू नये यासाठी चोख पोलीस बंदोबस्त तैनात करण्यात आल्याची माहिती निवडणूक निर्णय अधिकाऱ्यांनी दिली आहे.