यवतमाळ जिल्ह्यातील उमरखेड तालुक्यातील ढाणकी येथून २५ किलोमीटर अंतरावर असलेला सहस्त्रकुंड धबधबा वाहू लागला आहे. विदर्भ मराठवाड्याच्या सीमेवर असलेला सहस्त्रकुंड धबधबा पर्यटकांसाठी आकर्षणाचा विषय आहे. पावसाळा सुरू झाला की पर्यटकांना सहस्त्रकुंड धबधबा पाहण्याची आतुरता लागते. ३० ते ४० फुट उंचीवरून कोसळणारा हा धबधबा पाहण्यासाठी सध्या पर्यटक गर्दी करत आहेत.
सहस्त्रकुंडच्या बाजूला महादेवाचे मंदिर आहे. या धबधब्याच्या निमित्ताने खवळलेल्या नदीचे सुंदर रूप पाहण्यासाठी विदर्भ,मराठवाडा,आंध्र प्रदेश,तेलंगणा येथून पर्यटक धाव घेत आहेत. धबधब्याचे नयनरम्य दृश्य पाहण्यासाठी प्रशासनाने उंच मनोरे तयार केले आहे. तेथून सेल्फी काढता येत असल्याने पर्यटक आनंद घेत आहेत. सहस्त्रकुंड धबधब्याच्या किनाऱ्यावर एक सुंदर बगीचा तयार करण्यात आला आहे.