वाढत्या वैद्यकीय खर्चाच्या काळात, 'मल्टि-इयर हेल्थ इन्शुरन्स' (अनेक वर्षांसाठीचा आरोग्य विमा) हा तीन ते पाच वर्षांसाठी हप्ता (प्रीमियम )लॉक करण्याचा एक उत्तम पर्याय ठरत आहे. यामुळे दरवर्षी पॉलिसी रिन्यू करण्याचे टेन्शन राहत नाही आणि विमा कवच खंडित होण्याचा धोकाही टळतो.
बहु-वर्षीय आरोग्य विमा योजना दीर्घकालीन वचनबद्धतेसाठी ग्राहकांना बक्षीस देण्याच्या उद्देशाने तयार केल्या आहेत. विमा कंपन्या दोन वर्षांच्या प्लॅनवर १०% पर्यंत आणि तीन ते पाच वर्षांच्या प्लॅनवर २०% पर्यंत सूट देतात. साहजिकच, वार्षिक रिन्यूअलच्या तुलनेत एकूण प्रीमियमची रक्कम लक्षणीयरीत्या कमी होते.
प्रीमियम लॉक-इनचे फायदे
एकदा पॉलिसी खरेदी करताना प्रीमियम लॉक झाला की, विमा कंपन्या पॉलिसीच्या मुदतीदरम्यान त्यात वाढ करू शकत नाहीत, मग तुम्ही त्या काळात क्लेम (दावा) केला असला तरीही. हे पॉलिसीधारकांना वैद्यकीय महागाईपासून (Medical Inflation) वाचवते, कारण आरोग्य सेवांचे दर कितीही वाढले तरी तुमचा प्रीमियम स्थिर राहतो.
साधारणपणे, वय वाढते तसा विमा प्रीमियमही वाढतो. परंतु, मल्टि-इयर प्लॅनमध्ये तुमचा प्रीमियम पॉलिसी सुरू होताना असलेल्या वयावर आधारित असतो. यामुळे मुदतीदरम्यान वयोगट बदलला तरी प्रीमियममध्ये वाढ होत नाही.
सातत्यपूर्ण विमा कवच आणि नो क्लेम बोनस (NCB)
क्लेम न घेतल्याबद्दल मिळणारा 'नो क्लेम बोनस' मल्टि-इयर प्लॅनमध्ये कोणताही अडथळा न येता जमा होत राहतो. विमाधारकाला कोणत्याही गॅपशिवाय सतत संरक्षण मिळते, जे मोठ्या आणि अनपेक्षित वैद्यकीय खर्चाच्या वेळी अत्यंत महत्त्वाचे ठरते.
जरी या पॉलिसीसाठी सुरुवातीला मोठी रक्कम भरावी लागत असली, तरी अनेक कंपन्या आता मासिक (Monthly), त्रैमासिक किंवा सहामाही हप्त्यांची (EMI) सुविधा देतात, ज्यामुळे ग्राहकांवरील आर्थिक बोजा कमी होतो.
क्लेम सेटलमेंट (दावा प्रक्रिया)
या पॉलिसींमध्ये क्लेम करण्याची प्रक्रिया वार्षिक पॉलिसीप्रमाणेच असते. पॉलिसीच्या कोणत्याही वर्षी विमाधारक कोणत्याही निर्बंधाशिवाय दावा करू शकतो.
येथे एक गोष्ट लक्षात घेण्यासारखी आहे की, जरी पॉलिसी अनेक वर्षांची असली तरी 'सम इन्शुअर्ड' (विमा संरक्षण रक्कम) दरवर्षी रिसेट होते. पॉलिसीबाजारचे हेल्थ इन्शुरन्स हेड सिद्धार्थ सिंघल सांगतात, "उदाहरणार्थ, जर तुमची पॉलिसी दरवर्षी ५ लाख रुपयांचे संरक्षण देत असेल, तर मागील वर्षी कितीही क्लेम केला असला तरी, प्रत्येक नवीन वर्षाच्या सुरुवातीला पुन्हा ५ लाख रुपये उपलब्ध होतात."
तरुणांसाठी सर्वोत्तम पर्याय
तरुणांसाठी मल्टि-इयर हेल्थ इन्शुरन्स अधिक फायदेशीर आहे कारण त्यांना कमी प्रीमियममध्ये ३ ते ५ वर्षांसाठी संरक्षण मिळते. लवकर पॉलिसी घेतल्यामुळे विशिष्ट आजारांसाठीचा 'वेटिंग पिरीयड' (प्रतीक्षा काळ) तरुणपणातच पूर्ण होतो.
तरुण व्यक्तींमध्ये जोखीम कमी असते, त्यामुळे त्यांचा मूळ प्रीमियम कमी असतो. मल्टि-इयर प्लॅनमुळे हा कमी प्रीमियम स्थिर राहतो आणि वयानुसार किंवा महागाईनुसार होणाऱ्या दरवाढीचा परिणाम होत नाही.वार्षिक रिन्यूअलपेक्षा ही एकत्रित किंमत अधिक किफायतशीर ठरते.
कलम 80D अंतर्गत कर सवलत
मल्टि-इयर पॉलिसी खरेदी केल्यास तुम्हाला कलम 80D अंतर्गत भरलेल्या प्रीमियमवर प्रमाणबद्ध (Proportionate) कर वजावट मिळते. वार्षिक मर्यादा २५,००० रुपये (६० वर्षांखालील) किंवा ५०,००० रुपये (ज्येष्ठ नागरिक) आहे. जर तुम्ही जुनी कर व्यवस्था (Old Tax Regime) निवडली असेल तर एकूण भरलेला प्रीमियम पॉलिसीच्या वर्षांनी विभागला जातो आणि ती रक्कम दरवर्षी क्लेम करता येते,