गेल्या काही दिवसांपासून धगधगत असलेल्या अमेरिका आणि इराणमधील संघर्षाला अखेर तात्पुरता पूर्णविराम मिळाला आहे. दोन्ही देशांनी दोन आठवड्यांच्या युद्धविरामाची (Ceasefire) घोषणा केल्याने जागतिक बाजाराने सुटकेचा निश्वास सोडला आहे. या सकारात्मक घडामोडीचा थेट परिणाम कच्च्या तेलाच्या किमतींवर झाला असून जागतिक स्तरावर 'ब्रेंट क्रूड'च्या दरात सुमारे १७% पर्यंत मोठी घसरण पाहायला मिळाली आहे. या पार्श्वभूमीवर भारतीय सराफा बाजारात सोने आणि चांदीच्या भविष्यातील वाटचालीकडे गुंतवणूकदारांचे लक्ष लागले आहे.
सोन्याचा तांत्रिक कल
बाजार तज्ज्ञांच्या मते, युद्धविरामामुळे सोन्याची सुरक्षित गुंतवणूक म्हणून असलेली मागणी थोडी कमी होऊ शकते. मात्र, खालच्या स्तरावर खरेदीदारांचा वाढलेला रस अजूनही बाजारातील मजबुती दर्शवत आहे. जर सोन्याने १,५५,००० रुपयांची पातळी ओलांडली, तर ही गती पुन्हा वाढून भाव १,५८,००० ते १,६०,००० च्या दिशेने जाऊ शकतात. मात्र, तणाव कमी झाल्याने जर सोन्याने १,५२,००० ची खालची पातळी तोडली, तर मोठी घसरण होऊन भाव १,५०,००० आणि अगदी १,४८,००० रुपयांपर्यंत खाली येऊ शकतात.
चांदीतील तेजी आणि औद्योगिक मागणी
चांदीच्या बाबतीत बाजार अजूनही सकारात्मक आहे. औद्योगिक धातूंच्या मागणीमुळे चांदीची सुरुवात मोठ्या वाढीसह झाली आहे. सध्या चांदीचे दर २,४२,००० ते २,४५,००० दरम्यान असून बाजारात अस्थिरता कायम आहे. जर चांदीने २,४५,००० चा अडथळा पार केला, तर भाव २,४७,००० ते २,५०,००० पर्यंत पोहोचू शकतात. मात्र, २,४०,००० च्या खाली गेल्यास विक्रीचा दबाव वाढून भाव २,३४,००० पर्यंत घसरू शकतात.
भारतीय बाजारपेठेत आज सोन्याच्या दरांमध्ये मोठी हालचाल पाहायला मिळत आहे. आज २४ कॅरेट शुद्ध सोन्याचा दर प्रति १० ग्रॅम अंदाजे १,५३,८२० वर पोहोचला आहे, तर दागिने तयार करण्यासाठी वापरल्या जाणाऱ्या २२ कॅरेट सोन्याचा भाव प्रति १० ग्रॅम १,४१,००० इतका नोंदवण्यात आला आहे. त्याचबरोबर औद्योगिक मागणी आणि जागतिक घडामोडींमुळे चांदीचा दर प्रति किलो २,६०,००० च्या आसपास व्यवहार करत आहे.