लिंगमळा धबधब्याकडे जाणारा रस्ता खचला

महाबळेश्वर // महाबळेश्वरात मागील दोन दिवसांपासून मुसळधार पाऊस सुरू असून 24 तासात महाबळेश्वरात 480 मिलिमीटर पावसाची नोंद झाली आहे. महाबळेश्वर येथील प्रसिद्ध असलेला लिंगमळा धबधबा मुसळधार पावसाने ओसंडून वाहत आहे. गेल्या दोन दिवसांपासून पडणाऱ्या मुसळधार पावसाने या भागात मोठ्या प्रमाणात नुकसान झाले आहे. मुसळधार पावसाने महाबळेश्वर परिसरातील सर्वच रस्ता जलमय झालेले पाहायला मिळत आहे. दरम्यान लिंगमळा धबधब्याकडे जाणारा रस्ता संपूर्ण खचला असून रस्ता तीन ते चार फूट खचला आहे. स्थानिकांनी आणि पर्यटकांनी धबधब्याकडे जाऊ नये असे आवाहन प्रशासनाच्यावतीने करण्यात आले आहे.

मुसळधार पावसामुळे जनजीवन विस्कळीत

मागील 24 तासात झालेल्या 480 मिलीमीटर पावसाने महाबळेश्वर- पांचगणी मुख्य रस्त्यावर पाणीच पाणी झाल्याचे चित्र पाहायला मिळत आहे. वेण्णा लेक ते लिंगमळा परिसरात पावसाचा जोर अधिक असल्याने तेथील रस्त्यावर पाणी साचल्याने वाहतुकीवर मोठा परिणाम झाला आहे. तर शेतीसह ,अनेकांच्या घरात पावसाचे पाणी शिरल्याने नागरिकांना मोठा त्रास सहन करावा लागतोय.

काही ठिकाणी संरक्षक भिंती कोसळल्या आहेत तर काही ठिकाणी विजेच खांब कोसळल्याच्या घटना घडल्या आहेत. त्यामुळे महाबळेश्वर परिसरातील अनेक गावांमध्ये वीजपुरवठा विस्कळीत झाला आहे. महाबळेश्वर प्रतापगड रस्त्यावरील धबधबे ओसंडून वाहत असल्याने घाटरस्त्यावर जागोजागी पाणी साचल्याने रस्ता वाहतुकीवर परिणाम झाला असून अनेक ठिकाणी रस्ता धोकादायक बनला असल्याने प्रशासनाच्या वतीने नागरिकांना तसेच पर्यटकांना सर्तकतेच्या सुचना देण्यात आल्या आहेत .