संसदेत शब्दांवर बंधन नाही, टीकेनंतर लोकसभा अध्यक्षांची माहिती

संसदेत बोलताना सदस्यांनी कोणते शब्द वापरावे यासाठी असंसदीय शब्दांची नवीन यादी लोकसभा सचिवालयाने तयार केली असल्याची चर्चा सुरू झाली आणि सरकारवर विरोधकांनी जोरदार टीका केली. यामुळे दिवसभर राजकीय वातावरण देखील तापले होते. पण लोकसभा अध्यक्ष ओम बिर्ला यांनी या वादावर प्रतिक्रिया दिली आहे.

संसदेत कोणत्याही शब्दावर बंधन घालण्यात आलेले नाही, पण सदस्यांनी व्यक्त होतांना सभागृहाची प्रतिष्ठा राखली जाईल याची खबरदारी घ्यावी, असे आवाहन लोकसभा अध्यक्षांनी केले आहे. लोकसभा सचिवालयाने लज्जा, जुमलेजीवी, तानाशाह, भ्रष्ट, नाटक, ढोंग अशा शब्दांचा समावेश असलेली एक पुस्तिका प्रसिद्ध केली आहे, त्यात या शब्दांचा असंसदीय यादीत समावेश करण्यात आला होता. यावरुनच काँग्रेसचे नेते राहुल गांधी यांनी सरकारवर टीका देखील केली होती. मोदी सरकारच्या अपयशाचे वर्णन करणारे शब्द असंसदीय आहेत, अशी व्याख्या करण्यात आली आहे, असा टोला त्यांनी लगावला होता.

पण आता या वादावर लोकसभा अध्यक्षांच्या निर्वाळ्यानंतर पडदा पडला आहे. संसदीय प्रक्रियेची माहिती नसलेले लोक याबाबत बोलत आहेत, असे बिर्ला यांनी प्रतिक्रिया देताना सांगितले. १९५४ पासून असंसदीय शब्दांची यादी तयार करण्याची परंपरा आहे, अशी माहितीही त्यांनी दिली. प्रसिद्ध करण्यात आलेल्या पुस्तिकेत ज्या शब्दांचा समावेश करण्यात आला आहे, त्यांचा वापर सत्ताधारी आणि विरोधी पक्षातील सदस्यांकडून करण्यात आल्याचेही बिर्ला यांनी यावेळी सांगितले.