सत्ताधारी राष्ट्रवादी काँग्रेसचे आमदार आणि एका पोलीस अधिकाऱ्याच्या वादावादीचा व्हिडिओ सध्या सोशल मीडियावर व्हायरल झाला आहे. हे आमदार महोदय या व्हिडिओमध्ये पोलीस ठाण्यातच पोलिसांना अश्लील शिवीगाळ करत असताना दिसत आहेत. त्यानंतर पोलीस अधिकारी आणि या आमदारांमध्ये जोरदार खडाजंगी देखील झाल्याचे यामध्ये दिसत आहे. भंडारा जिल्ह्यातील तुमसर मोहाडी मतदारसंघाचे राष्ट्रवादी काँग्रेसचे आमदार राजू कोरमोरे यांचा हा व्हिडिओ आहे. कोरमोरे यांच्या काही व्यापारी मित्रांना पोलिसांनी मारहाण केल्याचा आरोप ते करत आहेत. पण पोलीस ठाण्यात जाऊन त्यांनी पोलिसांना अश्लील शिविगाळ केली तसेच पोलिसांवर खंडणी वसुलीचा आरोप देखील केला आहे. एवढेच नाही तर पोलिसांनी गाडीतील ५० लाख रुपये आणि सोन्याची चेन चोरल्याचा आरोप या व्यापाऱ्यांनी केला आहे.
या मारहाणीनंतर आमदार कोरमोरे हे पोलीस ठाण्यात गेले आणि तिथे त्यांनी जोरदार धिंगाणा घातल्याचा व्हिडिओ व्हायरल झाला आहे. संतापाच्या भरात आपण काही अपशब्द वापरले असू शकतात, पण व्हिडिओ अर्धवट व्हायरल केले जातात, पोलिसांची मुजोरी त्यात दिसलेली नाही, असे आमदारांनी म्हटले आहे. पण सत्ताधारी पक्षाचे असतानाही आपण पोलिसांवर खंडणी वसुलीचा आरोप करत असल्याचे पत्रकारांनी विचारले तेव्हा त्यांनी तेथील वरीष्ठ पोलीस अधिकाऱ्यांवर गंभीर आरोप केले. तसेच याबद्दल मुख्यमंत्री, उपमुख्यमंत्री यांच्याकडेही तक्रार करणार असल्याचे त्यांनी सांगितले.