रद्द झालेली म्हाडाची भरती परीक्षा 29 जानेवारी ते 3 फेब्रुवारीदरम्यान होणार

मुंबई : घोटाळ्यानंतर रद्द झालेली म्हाडाची भरती परीक्षा 29 जानेवारी ते 3 फेब्रुवारीदरम्यान होणार आहे. या परीक्षेचे वेळापत्रक जाहीर झाले असून ऑनलाइन पद्धतीने आणि 'टीसीएस'च्या माध्यमातून ही परीक्षा होणार आहे. परीक्षेचे अंतिम वेळापत्रक म्हाडाच्या संकेतस्थळावर प्रसिद्ध करण्यात आले आहे. 29, 30 आणि 31 जानेवारी तसेच 1 ते 3 फेब्रुवारी रोजी म्हाडा भरती परीक्षा होणार आहे.

म्हाडातील 144 पदांच्या 565 रिक्त जागा भरण्यासाठी 12 ते 20 डिसेंबरदरम्यान परीक्षा होणार होती. मात्र परीक्षेला काही तास शिल्लक असताना, राज्य सरकारकडून ही परीक्षा रद्द करण्यात आली होती. त्यामुळे परीक्षेला बसल्याने उमेदवारांनी तीव्र नाराजी व्यक्त केली होती.तब्बल दोन लाखांपेक्षा जास्त अर्ज या परीक्षेसाठी आले होते.

म्हाडा परीक्षेची प्रश्नपत्रिका फोडण्यात आल्याचे पुढे आल्यानंतर ही परीक्षा रद्द करण्यात आली होती. याबाबत जी. ए. सॉफ्टवेअर कंपनीच्या एका संचालकाने प्रश्नपत्रिका फोडण्याचा डाव आखला होता. पुणे सायबर पोलिसांनी कारवाई करत कंपनीच्या संचालकाला आणि दलालांना अटक केली आहे.