देशात कोरोनाच्या रुग्णांची संख्या दिवसेंदिवस वाढत आहे. सरकार मास्क वापरणे, सामाजिक अंतर ठेवणे यासारख्या गोष्टींसाठी आवाहन करत आहे. पण दुसरीकडे हरिद्वारमध्ये सोमवारी झालेल्या कुंभमेळ्यामध्ये काही जणांना कोरोनाची लागण झाल्याचे उघड झाले आहे. या कुंभमेळ्यात सुमारे 31 लाख लोकांनी शाही स्नान केल्याचे सांगितले जात आहे. पण इथल्या घाटांवर कुठेही कोरोना नियमांचे पालन झाल्याचे दिसले नाही. कुंभमेळ्यासाठीचे इन्स्पेक्टर जनरल संजय गुंज्याल यांनी कोरोना नियमांचे इथे पालन होत नसल्याची कबुली दिली आहे. प्रचंड गर्दीमुळे इथे कोरोना नियमांचे पालन करणे शक्य नसल्याचे त्यांनी ANI या वृत्तसंस्थेशी बोलताना स्पष्ट केले. आम्ही लोकांना सातत्याने नियमांचे पालन करण्याचे आवाहन करत आहोत. पण प्रचंड गर्दीमुळे नियम मोडणाऱ्यांना दंड करणेही शक्य नसल्याचे त्यांनी सांगितले.
दरम्यान इंडियन एक्स्प्रेसने दिलेल्या वृत्तानुसार रविवार आणि सोमवारी हजारो भाविकांची कोविड टेस्ट करण्यात आली असून त्यापैकी 102 लोक पॉझिटिव्ह आले आहेत. दोन दिवसात इथे लाखो लोक येऊन गेले आहेत. त्यामुळे हा कुंभमेळा कोरोनाच्या बाबतीत सुपरस्प्रेडर ठरण्याची भीती काही जण व्यक्त करत आहेत.