बोदवड तालुक्यात प्रधानमंत्री सुक्ष्म ठिबक योजनेत मोठा भ्रष्टाचार ? ; तालुका कृषी अधिकाऱ्यांनी दिले चौकशीचे आश्वासन

जळगाव : जळगाव जिल्ह्यातील बोदवड तालुक्यामध्ये प्रधानमंत्री सूक्ष्म ठिबक योजनेमध्ये कोट्यवधींचा भ्रष्टाचार झाल्याचं समोर आलं आहे. ज्या शेतकऱ्यांच्या शेतामध्ये विहिर व विद्युत कनेक्शन ही नाही अशा शेतकऱ्यांना ठिबक सिंचन या योजनेचा लाभ देण्यात आला आहे, या सर्व घटनेबद्दल तालुका कृषी अधिकारी अभिनव माळी यांनी चौकशी करण्याचे आश्वासन दिले आहे.

बोदवड तालुक्यामध्ये आत्तापर्यंत 534 शेतकऱ्यांना प्रधानमंत्री सुक्ष्म ठिबक योजनेचा लाभ दिला गेला आहे. या योजनेमध्ये कोट्यवधी रुपयाचा भ्रष्टाचार झाल्याचे शेतकऱ्यांचे म्हणणे आहे. ज्या शेतकऱ्यांच्या शेतामध्ये कुपनलिका, विहिर किंवा लाईटचे कनेक्शन ही नाही अशा शेतकऱ्यांना फक्त सातबारा उतारा घेऊन दलालामार्फत ठिबक सिंचन योजनेचा लाभ देण्यात आला आहे. शेतकऱ्यांना माहिती नसतानाही सातबारा उतारा घेतला जात असल्याचेही शेतकऱ्यांचे म्हणणे आहे.

शेतकऱ्याच्या बँक अकाऊंट मध्ये पैसे जमा झाले की संबंधित दलाल शेतकऱ्याला बँकेत घेऊन जातात व बँकेतून जमा झालेली रक्कम काढायला लावून निम्मी रक्कम त्यांच्याकडून घेत असल्याबाबतचा एक व्हिडिओ सोशल मीडियावर व्हायरल झाला आहे. हा व्हिडिओ व्हायरल झाल्यानंतर जिल्ह्यात चर्चेचा उधान आलं आहे. याबाबत बोदवडचे तालुका कृषी अधिकारी अभिनव माळी यांनी संबंधितांवर कारवाई करण्याची आश्वासन दिले आहे.

या घोटाळ्यांमध्ये बड्या अधिकाऱ्यांचा समावेश असल्याची चर्चा सध्या जिल्ह्यात सुरू असून याबाबत योग्य चौकशी करून दोषींवर कठोर कारवाई करण्याची मागणी शेतकऱ्यांमधून होत आहे.