एस.टी.डेपोचे बांधकाम संथ गतीने ; आ.काशिराम पावरा यांनी व्यक्त केला संताप

शिरपूर // शहरातील एस. टी. डेपोचे बांधकाम खूपच संथ गतीने सुरु असून आमदार काशिराम पावरा यांनी अधिकाऱ्यांशी संपर्क साधत संताप व्यक्त केला. शिरपूर बसस्थानकाचे बांधकाम वेळेत पूर्ण करण्याच्या सूचना देऊन प्रवाशांना सुविधा उपलब्ध करून देण्याचाही सूचना त्यांनी अधिकाऱ्यांना दिल्या.

शिरपूर बस स्थानकातील वर्कशॉपचे नवीन बांधकाम गेल्यावर्षी सुरू झाले आहे. एका वर्षात बस स्थानकाचे काम पूर्ण व्हावे अशी अपेक्षा होती. परंतु, नवीन बसस्थानकाचे काम झालेले नाही. यामुळे तालुक्यातील प्रवाशांनी अनेकदा नाराजी व्यक्त केली आहे. याबाबत शिरपूर तालुक्याचे आमदार काशिराम पावरा यांनी सोमवारी शिरपूर बस स्थानकाला भेट दिली आणि कामाची पाहणी केली.

एस.टी वर्कशॉपच्या समोर मोठ्या जागेत गेल्या वर्षापासून नवीन एस.टी. डेपो वर्कशॉपचे दोन मजली आर.सी.सी काम सुरु आहे. ते काम पूर्ण झाल्यानंतर एस.टी. बस स्थानकाचे काम सुरू होणार असल्याचे अधिकाऱ्यांनी यावेळी सांगितले.

यावेळी आमदार काशिराम पावरा यांनी एस.टी महामंडळाचे नाशिक येथील कार्यकारी अभियंता व धुळे येथील उपअभियंता यांच्याशी संपर्क साधून कामाबाबत विचारपूस करत संताप व्यक्त केला. अधिकाऱ्यांनी कोरोनाच्या पहिल्या लाटेत मजुरांअभावी व निधी अभावी कामात अडथळे आल्याचे सांगितले. तसेच यावर्षी देखील निधी अभावी नियमितपणे काम करण्यात अडचणी आल्याचे सांगितले.

यावेळी आमदार काशिराम पावरा यांनी यावर्षी कोरोना काळात कोणतेही विकास कामे थांबवू नये अशा शासनाच्या स्पष्ट सूचना असल्याचे सांगितले. संबंधित अधिकाऱ्यांनी महामंडळाकडून निधी मिळत नसल्याचे सांगितले. आतापर्यंत झालेल्या शिरपूर एस.टी डेपो वर्कशॉपच्या दोन मजली कामात एकही रुपया निधी महामंडळाकडून मिळाला नसल्याचे सांगितले. कोरोनामुळे एस.टी महामंडळाला आर्थिक फटका बसल्याने महामंडळाकडून निधी मिळत नसल्याचे समजते. हे सर्व ऐकल्यानंतर आमदार काशिराम पावरा यांनी संबंधित सर्व अधिकाऱ्यांना एस.टी बस स्थानकाचे काम वेळेत पूर्ण करावे व प्रवाशांना सुविधा उपलब्ध करून द्याव्या अशा स्पष्ट सूचना दिल्या.

दरम्यान एस.टी डेपो मॅनेजर वर्षा पावरा, वाहतूक नियंत्रक मनोज पाटील यांनी लवकरात लवकर पाठपुरावा करून शिरपूरचे बसस्थानक प्रवाशांच्या सोयीसाठी उपलब्ध करून देण्यासाठी पूर्णपणे प्रयत्न करणार असल्याचे सांगितले.