सरकारी काम आणि कोविड निगेटीव्ह सर्टिफिकेट मिळेपर्यंत थांब!

बुलडाणा – कोरोनाच्या वाढत्या रुग्णांच्या पार्श्वभूमीवर सरकारी कार्यालयांमध्येही कर्मचाऱ्यांची उपस्थिती कमी आहे. पण आता बुलडाणा जिल्हा परिषदेत सामान्य नागरिकांना कोरोना निगेटिव्ह रिपोर्ट असल्याशिवाय प्रवेश मिळणार नाहीये. सामान्य लोकं आपल्या कामासाठी येतातच, पण आंदोलनं, निवेदने देण्यासाठी सर्व शासकीय कार्यालयांमध्ये असंख्य लोक अधिकाऱ्यांच्या कक्षात जात आहेत, असे कारण देत बुलडाणा जिल्ह्याच्या मुख्यालयातील सर्व शासकीय कार्यलयांमध्ये प्रवेश करण्यासाठी आता कोरोना निगेटिव्ह रिपोर्ट बंधनकारक करण्याचा निर्णय जिल्हा परिषदेच्या उपमुख्याधिकारी इंदिरा डावरे यांनी घेतला आहे आणि त्या निर्णयाची कडक अंमलबजावणी सुरू झाली आहे.

काही दिवसापासुन शासकीय कार्यलयांमधील बरेच अधिकारी-कर्मचारी पॉजिटिव्ह आले आहेत, यामध्ये काही कर्मचाऱ्यांचा मृत्यूसुद्धा झाला आहे. त्याच धर्तीवर बुलडाणा जिल्हा परिषदेच्या उपमुख्याधिकाऱ्यांनी कोरोना चाचणी निगेटिव्ह प्रमाणपत्र आवश्यक असल्याचा निर्णय घेतला आहे. त्यामुळे नागरिक सतर्क झाले असून कोरोना वाढीला ब्रेक लागेल असे अधिकाऱ्यांचे म्हणणे आहे. नागरिकांनी प्रत्यक्ष कार्यालयात येण्याचे टाळावे आणि आपल्या काही समस्या असतील त्या कार्यालयाला ऑनलाइन पद्धतीने कळवाव्या त्यांच्या समस्यांचे निवारण करण्याचा प्रयत्न केला जाईल असे आवाहन देखील अधिकाऱ्यांकडून करण्यात आले आहे.

पण यामुळे पुन्हा एकदा सामान्यांची कोंडी होणार आहे. ग्रामीण भागासह शहरांमध्येही कोरोना चाचणीचा रिपोर्ट मिळण्यास उशीर लागत आहे. तसेच एकाच कामासाठी एखाद्या व्यक्तीला वारंवार चकरा माराव्या लागल्या तर त्याने कितीवेळा चाचणी करायची असा देखील प्रश्न उपस्थित झाला आहे.