#Lockdown2021- मुंबईत सोसायट्यांवर पुन्हा निर्बंध, वृत्तपत्रे, पार्सल देणाऱ्यांना मनाई
मुंबईत कोरोनाचे रुग्ण वाढत असताना आता महापालिकेने रहिवासी सोसायट्यांवर काही नवीन आणि कडक निर्बंध घातले आहेत.
मुंबईसह राज्यात कोरोनाचे रुग्ण वेगाने वाढत आहेत. या पार्श्वभूमीवर मुंबई महापालिकेने निर्बंध आणखी कडक केले आहेत. एखाद्या सोसायटीमध्ये ५ पेशंट आढळून आल्यास ती सील करून " मिनी कंटेन्मेंट " घोषित केले जाणार आहे. तर फेरीवाले, वृत्तपत्रे, पार्सल घरी पोहोचविणारे यांना सोसायटीमध्ये येण्यास मनाई करण्यात आली आहे. सध्या झोपडपट्टीत कोरोना रुग्णांची संख्या कमी असून सोसायटयांमध्ये कोरोना रुग्णांच्या संख्येत वाढ होताना दिसत आहे. त्यामुळे मुंबई महापालिकेचे आयुक्त इकबाल चहल यांनी, काही नवीन नियम जारी केले आहेत. त्यानुसार ज्या सोसायटीमध्ये कोरोनाचे ५ रुग्ण आढळतील ती सोसायटी सील करण्यात येणार असून त्या सोसायटीला 'मिनी कंटेन्मेंट' म्हणून घोषित करण्यात येणार आहे. सदर, सोसायटीमध्ये नागरिकांच्या माहितीसाठी कोरोनाबाधित रुग्णांबाबतची माहिती दर्शवणारे फलक दर्शनीय ठिकाणी लावण्यात येणार आहे. तसेच, अशा सोसायटीत बाहेरील नागरिकांना प्रवेश बंदी असणार आहे.
सोसायटीच जबाबदार
कोरोनाला नियंत्रित करण्याची जबाबदारी सोसायट्यांवर टाकण्यात आली आहे. सोसायटीमधील कोरोना रुग्णांवर लक्ष ठेवण्याची जबाबदारी सोसायटीची असणार आहे. कंटेन्मेंट झोनमधील सोसायटीत कोरोनासंदर्भातील नियमांचे उल्लंघन झाल्यास संबंधित सोसायटीला १० हजार रुपये दंड करण्यात येणार आहे. त्याच सोसायटीमध्ये पुन्हा पुन्हा नियमांचे उल्लंघन झाल्यास २० हजार रुपयांचा दंड आकारण्यात येणार आहे. प्रत्येक सीलबंद सोसायटी, इमारतीच्या प्रवेशद्वारात पोलीस कर्मचारी ठेवण्यात येणार आहेत, असे सदर परीपत्रकात म्हटले आहे. तसेच, किराणा, औषधे, भाजीपाला आदी जीवनावश्यक वस्तू वगळता इतर सर्व प्रकारची दुकाने, मॉल्स, बाजारपेठा ३० एप्रिलपर्यंत बंद ठेवण्यात येणार आहेत.
सोसायटीमध्ये फेरीवाले, वृत्तपत्रे, पार्सल घरी पोहोचविणारे यांना मनाई करण्यात आली आहे. ज्या नागरिकांना वृत्तपत्रे हवीत, अन्नपदार्थ हवेत त्यांनी सोसायटीच्या गेटवर येऊन ते घेऊन जावे, असे परिपत्रकात म्हटले आहे. त्याचप्रमाणे, कोरोनाबाधित व्यक्तीला होम क्वारंटाईन असताना स्वतःच्या फ्लॅटच्या बाहेर येण्यास अथवा सोसायटीबाहेर फिरण्यास मनाई करण्यात आली आले. जर असा व्यक्ती, रुग्ण फ्लॅटच्या अथवा सोसायटीच्या बाहेर आढळून आल्यास त्याचा फ्लॅट सील करण्यात येणार असून त्याच्याविरोधात एफआयआर दाखल करण्यात येणार आहे.