बाबा रामरहिमच्या पाठिराख्यांनी एकीकडे अंधभक्तीतून थैमान घातलेलं असताना दुसरीकडे इकडे महाराष्ट्रात सनातन प्रभात या दैनिकातून उघडपणे अंधश्रद्धेला खतपाणी घालणे सुरु आहे. दैनिक सनातन प्रभात अंगावर घेतल्यानं आरोग्याची व्याधी दूर झाल्याचा अजब दावा दैनिक सनातन प्रभात मधून करण्यात आला आहे. सनातनच्या आश्रमातील सोनाली गायकवाड या तरुणीचा याबाबतचा अनुभव सनान प्रभातमध्ये प्रसिद्ध करण्यात आला आहे. यामध्ये सोनालीने दावा केला आहे की, 'काही दिवसांपूर्वी मला अध्यात्मिक त्रास होत होता. मला माझा तोंडवळा, डोके आणि कान यावर पुष्कळ आवरण आले आहे. दैनिक सनातन प्रभातची गोल गुंडाळी करुन मध्ये पोकळी ठेवून त्याची बाजू डोळ्यांवर धरल्यावर माझ्या डोळ्यांवरील आवरण न्यून झाले. नाक, कान, आज्ञाचक्र आणि अनाहतचक्र यावरही अशाप्रकारे सनातन प्रभात धरून उपा. केल्यावर मला हलके वाटले'
या बातमीत पुढे असेही म्हटले आहे की, 'दैनिक सनातन प्रभातची घडी करून तोंडवळा, डोके आणि छाती यावर अर्धा मिनिट ठेवल्याने तेथील आवरण शून्य होत असल्याचे मला जाणवले'