चांदीने दिला १ वर्षात १२५% परतावा, अनिल अग्रवाल म्हणतात, 'ही तर फक्त सुरुवात'

२०२५ हे वर्ष सोन्यापेक्षाही चांदीसाठी (Silver) अधिक लकी ठरले आहे. जागतिक आणि देशांतर्गत बाजारात चांदीने अशा काही उड्या घेतल्या आहेत की, खुद्द सोन्याची चमकही त्यापुढे फिकी पडली आहे.

चांदीच्या या विक्रमी घोडदौडीवर वेदांता ग्रुपचे चेअरमन अनिल अग्रवाल (Anil Agarwal) यांनी एक मोठे विधान केले असून, चांदी आता सोन्याच्या सावलीतून बाहेर पडल्याचे म्हटले आहे.

चांदीची ऐतिहासिक कामगिरी : १ वर्षात १२५% रिटर्न्स

अनिल अग्रवाल यांनी सोशल मीडिया प्लॅटफॉर्म 'X' वर पोस्ट करत म्हटले की, "या वर्षी चांदीने सोन्याच्या तुलनेत दुप्पट वेगाने वाढ नोंदवली आहे. डॉलरच्या टर्म्समध्ये चांदीने वर्षभरात (YTD) तब्बल १२५% परतावा दिला आहे. तर सोन्याने याच काळात ६३% वाढ नोंदवली आहे." अग्रवाल यांच्या मते, चांदीची ही तेजी केवळ सट्टेबाजी नसून ती आता एका 'दीर्घकालीन स्ट्रक्चरल फेझ'मध्ये (Structural Phase) प्रवेश करत आहे.

नेमका का वाढतोय चांदीचा भाव ?

चांदीच्या या रेकॉर्डब्रेक तेजीमागे दोन मुख्य कारणे आहेत :

1.चांदी हा एकमेव असा धातू आहे ज्याला स्वतःचे आर्थिक मूल्य (Intrinsic Value)

तर आहेच, पण त्यासोबतच त्याला प्रचंड 'औद्योगिक मागणी' (Functional Demand) सुद्धा आहे.

2. सोलर पॅनल्स (Solar Cells), इलेक्ट्रिक वाहने, आधुनिक गॅझेट्स आणि संरक्षण क्षेत्रातील

उपकरणांमध्ये चांदीचा वापर अनिवार्य झाला आहे. त्यामुळे भविष्यात याची मागणी वाढतच राहणार आहे.

MCX वर चांदी २.२३ लाखांच्या पार !

बुधवारी (२४ डिसेंबर) चांदीच्या दरांनी पुन्हा एकदा नवा इतिहास रचला.

चांदी (MCX March Futures): सुमारे २% ने वधारून २,२३,७४२ रु.प्रति किलो या सर्वकालीन उच्चांकावर

(All-Time High).

सोने (MCX Feb Futures):०.४०% ने वाढून १,३८,४२८ रु.प्रति १० ग्रॅमच्या रेकॉर्ड लेव्हलवर.

हिंदुस्तान झिंकला मोठा फायदा (Vedanta Connection)

भारतात चांदीचे उत्पादन करणारी एकमेव प्रमुख कंपनी हिंदुस्तान झिंक (Hindustan Zinc)आहे,

जी वेदांता ग्रुपचा भाग आहे. चांदीच्या वाढत्या किमतींचा थेट फायदा कंपनीच्या बॅलन्स शीटवर दिसत आहे.

कंपनीच्या नुकत्याच जाहीर झालेल्या आर्थिक निकालांमध्ये झिंकसोबतच आता चांदी देखील कमाईचा मुख्य स्रोत

(Key Earnings Driver) बनली आहे.

गुंतवणूकदारांसाठी काय सल्ला ?

अनिल अग्रवाल यांनी स्पष्ट केले की, "किमती खाली-वर होऊ शकतात, पण चांदीची ही 'असाधारण चमक' आता कायम राहणार आहे."

ज्या गुंतवणूकदारांनी चांदीत पैसे लावले आहेत, त्यांच्यासाठी हा काळ सुवर्णसंधी ठरला आहे.