परभणीत गुट्टेंच्या हट्टाने बहुमत हुकलं;बोर्डीकरांचे स्वबळाचे स्वप्न अपूर्ण!

परभणीच्या जिंतूर-सेलू विधानसभा मतदारसंघातून दुसऱ्यांदा निवडून आलेल्या भाजपाच्या आमदार मेघना बोर्डीकर यांना पक्षाने राज्यमंत्री पदासह परभणी जिल्ह्याचे पालकमंत्री पदाची जबाबदारी दिली. मुख्यमंत्री देवेंद्र फडणवीस यांनी ही मोठी संधी दिल्याने मेघना बोर्डीकर यांनी जिल्ह्यात भाजपाची ताकद वाढवण्यासाठी जोमाने काम केले.

स्थानिक स्वराज्य संस्थांच्या निवडणुका स्वबळावर लढण्याचा निर्णय घेतल्याने कधी नव्हे ते जिल्ह्यात भाजपाला चांगले यश मिळाले. जिंतूर व सेलूच्या २ नगराध्यक्षांसह जिल्ह्यात ३४ नगरसेवक निवडून आले. सोनपेठ नगरपालिकेत परिवर्तन आघाडीचे पॅनल उभे करून नगराध्यक्षांसह ८ नगरसेवक निवडून आणले.

परभणी महापालिकेत पहिल्यांदाच ३७ उमेदवार उतरवले, अल्पसंख्याक बहुल असलेल्या शहरात अपेक्षित यश न मिळता तरी १२ जागा जिंकल्या – हा भाजपासाठी मोठा टप्पा होता.

जिल्हा परिषदेवर स्वबळावर सत्ता स्थापन करण्याचा चंग मेघना बोर्डीकर यांनी बांधला. जिंतूर-सेलू मतदारसंघासह गंगाखेड, पूर्णा, पालम तालुक्यांत तुल्यबळ उमेदवार तयार केले. गंगाखेडमध्ये विशेष लक्ष केंद्रित केले, जिथे ७ गट, पूर्णा तालुक्यातील ६ आणि पालममध्ये ४ गटांवर जोर दिला.

पण ऐनवेळी गंगाखेडचे आमदार रत्नाकर गुट्टे यांनी गंगाखेड मतदारसंघातील भाजपाचे B फॉर्म स्वतःकडे मागितले. यशवंत सेनेच्या माध्यमातून नगर परिषद व महापालिकेत अपेक्षित यश न मिळाल्याने ते जिल्हा परिषदेसाठी भाजप तिकीटावर लढण्यास उत्सुक होते. पक्षाने सहयोगी आमदार असल्याने त्यांना B फॉर्म देण्याचे निर्देश दिले. पालकमंत्री बोर्डीकर यांनी वरिष्ठांकडे आग्रह धरून गंगाखेडमधील १७ पैकी ६ जागा स्वतःकडे ठेवल्या, उर्वरित ११ गुट्टे यांना मिळाल्या.बोर्डीकर यांनी दिलेल्या ६ उमेदवारांपैकी ५ विजयी झाले (गुंजेगाव - करुणा कुंडगीर, धारासुर - शोभा कदम, चुडावा - भरत घनदाट, चाटोरी - भरत घनदाट, पेठशिवनी - सविता मुरकुटे), तर एरंडेश्वरमध्ये स्मिता कदम यांचा निसटता पराभव झाला.

गुट्टे यांनी उभे केलेल्या ११ पैकी फक्त ४ विजयी झाले (राणीसावरगाव - अल्ताफ सय्यद, कोद्री - पार्वतीबाई मुंढे, बनवस - शांतीस्वरूप जाधव, महतापुरी - कुशावर्ता पोले), उर्वरित ७ पराभूत.गंगाखेडमध्ये ठाकरे सेनेच्या मंगलाबाई रोकडे व शिंदे सेनेच्या सावित्रीबाई फड यांना गुट्टे यांनी उमेदवारी नाकारली, त्यामुळे त्यांना इतर चिन्हे घ्यावी लागली.

वझुर, कावलगाव, गौर, ताडकळस या गटांत उमेदवारांना B फॉर्म न मिळाल्याने माघार घ्यावी लागली आणि या संभाव्य जागा गमावल्या.परभणी जिल्ह्यात भाजपाने ५४ पैकी २४ जागा जिंकल्या – हा जिल्ह्यातील सर्वाधिक जागा असून मोठा पक्ष ठरला. जिंतूर-सेलूत १५ पैकी ११, परभणीत ४ पैकी १, पाथरीत १८ पैकी ३ जागा मिळाल्या.

आमदार गुट्टे यांचा हट्ट व माजीमंत्री वरपुडकर यांच्यावर झालेल्या घराणेशाहीच्या आरोपामुळे 54 पैकी 24 जागा जिंकत परभणी जिल्हा परिषदेत सर्वात मोठा पक्ष ठरलेल्या भाजपाला 27 ही मॅजीक फिगर गाठण्यात यश आलं नाही. स्वबळावर जिल्हा परिषदेची सत्ता स्थापनेचे पालकमंत्री मेघना बोर्डीकर यांचे प्रयत्न धूसर ठरले. भाजपा मोठा पक्ष ठरला पण सत्ता स्थापनेसाठी कुबड्यांचा आधार घेण्याची वेळ भाजपावर आली.