Ajit Pawar Plane Crash : अजित पवारांच्या विमान अपघाताचा AAIB च्या प्राथमिक अहवाल आला समोर
मुंबई : २८ जानेवारी २०२६ रोजी बारामती येथे झालेल्या विमान अपघातात अजित पवार यांचे निधन झाले होते. या दुर्दैवी घटनेला आज एक महिना पूर्ण झाला आहे. अपघातानंतर रोहित पवार यांनी पत्रकार परिषद घेऊन या प्रकरणात अनेक प्रश्न उपस्थित केले होते आणि घातपाताची शक्यता व्यक्त केली होती.
दरम्यान, एअरक्राफ्ट अॅक्सिडेंट इन्व्हेस्टिगेशन ब्युरो (AAIB) चा २२ पानी प्राथमिक चौकशी अहवाल आता समोर आला आहे. या अहवालात अपघातामागील संभाव्य कारणांवर प्रकाश टाकण्यात आला असून हे निष्कर्ष प्राथमिक स्वरूपाचे असल्याचे स्पष्ट करण्यात आले आहे.
प्राथमिक अहवालातील महत्त्वाचे मुद्दे
दृष्यमानता VFR (Visual Flight Rules) च्या किमान मर्यादेपेक्षा कमी असतानाही लँडिंगचा प्रयत्न करण्यात आला.
एअरफिल्डवरील सुविधांचे मानक अपुरे होते.
बारामती येथे अधिकृत किंवा स्वतंत्र MET (हवामान) सुविधा उपलब्ध नव्हती.
हवामानविषयक माहिती आणि मूलभूत नेव्हिगेशन सहाय्यांमध्ये कमतरता होती.
अजित पवारांचा अपघात कसा घडला ?
AAIB च्या अहवालानुसार, मुंबईहून बारामतीकडे येत असताना विमानाने धावपट्टी क्रमांक ११ वर प्रथम लँडिंगचा प्रयत्न केला. मात्र, तो प्रयत्न अपयशी ठरल्याने ‘गो-अराऊंड’ करण्यात आला. त्यानंतर दुसऱ्या प्रयत्नात लँडिंग क्लिअरन्स मिळाल्यानंतर काही क्षणांतच विमान धावपट्टीच्या डाव्या बाजूस सुमारे ५० मीटर अंतरावर झाडांवर आणि जमिनीवर आदळले. त्यानंतर विमानाला आग लागून ते पूर्णपणे जळून खाक झाले. AAIB ने स्पष्ट केले आहे की, हा अहवाल प्राथमिक असून अंतिम अहवालात अधिक तपशील आणि निश्चित कारणे मांडली जातील.
