US-India Trade Deal : अमेरिकेने भारतावरील टॅरिफ घटवला, आता फक्त १८% टॅरिफ लागू
18% Tariff on Indian Exports भारतासाठी आनंदाची बातमी… भारतावर अमेरिकेतून आकारले जाणारे (परस्पर शुल्क) रिसिप्रोकल टॅरिफ 25 टक्क्यांवरुन 18 टक्क्यांवर आणत असल्याची घोषणा अमेरिकेचे राष्ट्राध्यक्ष ट्रम्प यांनी केली आहे. यासंदर्भात ट्रम्प यांनी एक्सवर पोस्ट शेअर केली आहे.
या पोस्टमध्ये डोनाल्ड ट्रम्प म्हणतात की,
पंतप्रधान नरेंद्र मोदी यांच्यासोबत बोलणं सन्मानाचं आहे. ते माझे चांगले मित्र आहेत आणि त्यांच्या देशातील ताकदवान आणि सन्माननीय नेते आहेत. आम्ही बऱ्याच गोष्टींवर बोललो. यामध्ये व्यापार, रशिया युक्रेन युद्ध संपवणे याचा समावेश आहे. रशियन तेल खरेदी थांबवण्यास मोदींनी सहमती दर्शवली ते अमेरिकेकडून अधिक तेल खरेदी करतील प्रामुख्यानं व्हेनेझुएलाकडून असं ट्रम्प यांनी म्हटलं. याची युक्रेनमधील युद्ध संपवण्यास मदत होणार आहे. जे युद्ध सध्या सुरु आहे. प्रत्येक आठवड्याला हजारो व्यक्ती मरत आहेत.
भारत आणि अमेरिका यांच्यातील व्यापारी करारवर आमच्यात सहमती झाली आहे. त्यामुळं अमेरिकेनं रेसिप्रोकल टॅरिफ कमी करण्याचा निर्णय घेतला असून ते 25 टक्क्यांवरुन 18 टक्क्यांवर आणत आहोत. आता ते देखील त्यांच्याकडील टॅरिफ चे दर कमी करण्याचे प्रयत्न करतील. अमेरिकेसोबत टॅरिफचा अडथळा येऊ नये म्हणून झीरो टॅरिफच्या दिशेनं प्रयत्न होतील, अशी अपेक्षा ट्रम्प यांनी वर्तवली.
पंतप्रधान नरेंद्र मोदी मोठ्या प्रमाणात अमेरिकेकडून खरेदी करण्यास कटिबद्ध असल्याचा दावा डोनाल्ड ट्रम्प यांनी केला आहे. 500 अब्ज डॉलर्सची अतिरिक्त खरेदी ज्यामध्ये अमेरिकन ऊर्जा, तंत्रज्ञान, कृषी, कोळसा आणि इतर उत्पादनांचा समावेश असेल. भारतासोबतचे संबंध आणखी मजबूत होतील, असं ट्रम्प म्हणाले. पंतप्रधान नरेंद्र मोदी आणि मी आम्ही दोघं हे पूर्ण होईल हे पाहू. अधिक काही बोलण्याची गरज नाही, असं डोनाल्ड ट्रम्प यांनी म्हटलं.
दरम्यान, पंतप्रधान नरेंद्र मोदी यांनीही या घोषणेचे स्वागत केले. त्यांनी X वर पोस्ट करत म्हटले,
"माझे प्रिय मित्र राष्ट्राध्यक्ष ट्रम्प यांच्याशी आज बोलणे झाले. 'मेक इन इंडिया' उत्पादनांना आता फक्त १८% टॅरिफ लागू होईल याचा आनंद आहे. भारताच्या १.४ अब्ज लोकांच्या वतीने राष्ट्राध्यक्ष ट्रम्प यांचे खूप खूप आभार!" पंतप्रधानांनी पुढे म्हटले की, ट्रम्प यांच्या नेतृत्वामुळे जागतिक शांतता, स्थिरता आणि समृद्धीला चालना मिळेल. भारत त्यांच्या शांततेच्या प्रयत्नांना पूर्ण पाठिंबा देत असून, भारत-अमेरिका संबंध अधिक मजबूत करण्यासाठी दोघेही देश जवळून काम करतील, अशी अपेक्षा त्यांनी व्यक्त केली.
Wonderful to speak with my dear friend President Trump today. Delighted that Made in India products will now have a reduced tariff of 18%. Big thanks to President Trump on behalf of the 1.4 billion people of India for this wonderful announcement.
— Narendra Modi (@narendramodi) February 2, 2026
When two large economies and the…
करारातील मुख्य मुद्दे
अमेरिकेने भारतीय निर्यातीवर पूर्वी २५% टॅरिफ आकारला होता. काही वेळा रशियन तेल आयातीच्या पार्श्वभूमीवर अतिरिक्त २५% दंडात्मक टॅरिफ मिळून एकूण ५०% पर्यंत टॅरिफ पोहोचला होता. आता हा दर १८% पर्यंत आणण्यात आला आहे, ज्यामुळे भारतीय निर्यातदारांना मोठा दिलासा मिळाला आहे. भारताने अमेरिकन वस्तूंवरील टॅरिफ आणि नॉन-टॅरिफ अडथळे कमी करण्याचे आश्वासन दिले आहे.
भारत रशियन तेल आयात थांबवून अमेरिका आणि इतर देशांकडून (उदा. व्हेनेझुएला) तेल खरेदी वाढवेल, अशी माहिती ट्रम्प यांनी दिली. भारत भविष्यात अमेरिकेकडून ऊर्जा, तंत्रज्ञान, शेती उत्पादने, कोळसा इत्यादींची $५०० अब्जांहून अधिक खरेदी करेल, असेही ट्रम्प यांनी सांगितले. लेदर, फूटवेअर, टेक्सटाईल, अभियांत्रिकी उत्पादने यांसारख्या क्षेत्रातील निर्यातदारांना या टॅरिफ कपातीचा मोठा फायदा होईल. अमेरिकन बाजारपेठेत भारतीय उत्पादनांची स्पर्धात्मकता वाढेल आणि किंमती कमी ठेवता येतील.
