Save Asiatic Society Mumbai : "ज्ञानसंस्थेवर सत्तेचा डोळा"

१४ मार्च २०२६ रोजी ज्ञानसंस्था असलेल्या एशियाटिक सोसायटी ऑफ मुंबई निवडणूकीसाठी मतदान होणार आहे. यासंदर्भात या दीपक पवार यांनी फेसबुक कुमार केतकर पॅनलच्या सदस्यांची यादी आणि व्हिडिओ शेअर केला आहे.

काय म्हटलंय दीपक पवार यांनी? 

मित्रहो,

होणार होणार म्हणून गाजत असलेली एशियाटिक सोसायटीची निवडणूक उद्या होते आहे. कुमार केतकर यांच्या नेतृत्वाखालच्या पॅनलमध्ये लढणाऱ्या आमच्या टीमची यादी आणि कुमार केतकर यांनी केलेले आवाहन सोबत देतो आहे. एकूण चारेक हजार मतदार आहेत. एका महानगराचा विचार करता ही संख्या काही फार मोठी नाही. अगदी अलिकडेपर्यंत सर्वसाधारण माणसाला अशी काही संस्था अस्तित्वात हेही माहीत नसेल. मग हे कसं कळलं? तर २०१४ नंतर या देशाला जे नवं स्वातंत्र्य मिळालं त्याच्या लाभार्थ्यांना राज्यातली, देशातली एकही संस्था इतर विचारांच्या लोकांच्या हातात राहू द्यायची नाहीये. राजकारणातल्या, प्रशासनातल्या लोकांना ईडी, सीबीआय, इन्कम टॅक्सची भीती दाखवून, पक्ष पळवून हवं ते साध्य करता येतं. पण ज्ञानव्यवहारातल्या संस्थांचं काय करणार? पुन्हा चिकित्सेशी छत्तीसचा आकडा असणारे, पूर्वगौरवात रमणारे लोक पाशवी बहुमत असलं, ट्रिपल इंजिनचं सरकार असलं तरी सतत व्हिक्टिम कार्ड वापरत राहणार. आपण दोन ओळींमधलं नीट वाचलंत तर गेले काही महिने चाललेला कांगावखोरपणा आपल्या सहज लक्षात येईल. सत्तेच्या केंद्रातून संस्था ताब्यात घेण्याचे सगळे प्रयत्न होऊनही जेव्हा मनासारख्या गोष्टी घडत नाहीत तेव्हा हे सुरू होतं. आमच्या पॅनलमधल्या लोकांची आपण स्वतंत्रपणे माहिती घेतली असेलच. आमच्या वैचारिक निष्ठा राज्यघटनेशी आणि ज्ञानव्यवहाराशी आहेत. पैसा कोणाकडे आहे हे उघड आहे. पैशाने निवडणुका फिरलेल्या आपण पाहिल्याही असतील. दोनेकशे वर्षांचा बौद्धिक वारसा असणाऱ्या संस्थेत गुणवत्ता, बांधीलकी, पारदर्शकता आणि उत्तरदायित्व महत्त्वाचं मानणारे लोक निवडून येतील असा आम्हाला विश्वास आहे. म्हणून आम्ही प्रचाराचा स्तरही उंचावलेलाच राखला आहे. उद्या मोठ्या संख्येने मतदान करा.येतांना ओळखपत्र आणायला विसरू नका ही विनंती.

Full View