कर्जासाठी युवकाचे जिल्हाधिकारी कार्यालयासमोर स्वातंत्र्य दिनापासून उपोषण
बुलडाणा : स्टेट बँक देऊळगाव मही शाखेकडून तीन वर्षे लोटल्यानंतरही युवकाला आणासाहेब पाटील आर्थिक विकास महामंडळाकडून १० लाखाचे कर्ज मिळण्याची आशेवर युवकाला झुलवत ठेवल्याने कंटाळून युवकाने जिल्हाधिकारी कार्यालयासमोर स्वातंत्र्य दिनापासून उपोषण सुरू केलं आहे.
वारंवार कागदपत्रे व्यवसाय सुरू करण्यासाठी आणासाहेब पाटील आर्थिक विकास महामंडळाकडून १० लाखांचा कर्ज पुरवठा करण्याबाबत अर्ज केल्यानंतरही स्टेट बँक देऊळगाव मही येथील शाखा व्यवस्थापक यांनी वेळकाढूपणा करून तब्बल तीन वर्षे झुलवत ठेवल्याचे युवकाचे म्हणणे आहे. शाखा व्यवस्थापक जाणून बुजून वारंवार फाईलमध्ये त्रुटी काढून वेठीस धरत असल्याची ज्ञानेश्वर म्हस्के यांनी म्हंटलं आहे. त्यामुळे ज्ञानेश्वर म्हस्के यांनी स्वातंत्र्य दिनापासून जिल्हाधिकारी कार्यालयासमोर बेमुदत उपोषण सुरू केले.
देऊळगाव राजा तालुक्यातील अंढेरा येथील ज्ञानेश्वर म्हस्के यांनी सन २०१८ साली आण्णासाहेब आर्थिक विकास महामंडळ यांच्याकडे १० लाखांचा कर्जपुरवठा करण्यासाठी अर्ज केला होता. महामंडळाकडून त्यांचा अर्ज पात्र ठरवण्यात आला होता. स्टेट बॅंक ऑफ इंडिया शाखा देऊळगाव मही शाखेकडून कर्ज प्रकरण दाखल करुन घेतल्याने व मंजूरसाठी बुलढाणा येथे पाठवले असता सर्व कागदपत्रांची पूर्तता करा तुमचे कर्ज प्रकरण मंजूर करतो असे ठोस आश्वासन शाखा व्यवस्थापक व अधिकारी यांनी दिल्याने ज्ञानेश्वर म्हस्के यांनी बँकेच्या खात्यामधून अपेक्षित व्यवहार केला असता , त्यानंतर ही कोणतेही गहाण खत लागत नसतानाही तीन वर्षांपासून कर्ज नाकारले जात असल्याचे म्हस्के यांचे म्हणणे आहे.
"भीक नको पण कुत्र आवर" या उक्ती प्रमाणे सदर प्रकरणात न्यायचं मिळत नसल्याने सदर युवकाने जिल्हाधिकारी अग्रणी बँकेचे अधिकारी तसेच शासनाकडे पत्रव्यवहार केल्यानंतर शासनाच्या अप्पर सचिवांनी नियमानुसार कारवाई करण्यासंदर्भात जिल्हाधिकाऱ्यांना पत्र दिले. तसेच तत्कालीन जिल्हाधिकाऱ्यांनी अग्रणी बँकेच्या जिल्हा प्रबंधकाना पत्र दिले होते. या पत्रावर अग्रणी बँकेने स्टेट बँकेच्या क्षेत्रीय प्रबंधक यांना योग्य ती कारवाई करण्याचे निर्देश दिले , तरीही कर्ज प्रकरण मंजूर झाले नाही. म्हणून अखेर न्याय मिळण्यासाठी ज्ञानेश्वर म्हस्के यांनी जिल्हाधिकारी कार्यालयासमोर उपोषण सुरू केले आहे.
"स्टेट बँकचे शाखा व्यवस्थापक व बुलढाण्याचे लोन अधिकारी यांनी माझ्याकडून वारंवार वेळोवेळी कागदपत्रांची पूर्तता करुन घेतली. हे करत असताना यामध्ये माझा मानसिक, आर्थिक व शारीरिक छळ झाला असुन बॅंक आता वेळकाढूपणा करून कार्यक्षेत्र नसल्याचे सांगत असून तीन वर्षे माझ्याकडून कागदपत्रे सादर करून का घेतली?त्या संबंधित ज्या - ज्या अधिकारी यांनी दिशाभूल केली. त्यांच्यावर योग्य ती कारवाई करून त्यांना निलंबित करण्यात यावे अशी मागणी म्हस्के यांनी केली आहे.