संजय राऊतांच्या नवीन ट्विटने तर्कवितर्क

आधी सचिन वाझे प्रकरण आणि आता परम बीर सिंह यांच्या गृहमंत्र्यांवरील आरोपांमुळे राज्यातील महाविकास आघाडी सरकारची कोंडी झाली आहे. या सर्व पार्श्वभूमीवर शिवसेनेतर्फे अजून अधिकृत प्रतिक्रिया आलेली नाही. पण आता महाविकास आघाडी तयार करण्यात महत्त्वाचा वाटा असलेले शिवसेनेचे खासदार संजय राऊत यांनी एक ट्टिवट केले आहे. संजय राऊत यांनी शुभ प्रभात म्हणत जावेद अख्तर यांचा एक शेर ट्विट केला आहे.

हमको तो बस तलाश नए

रास्तों की है

हम है मुसाफीर ऐसे जो

मंजिल से आए है

- जावेद अख्तर

याआधी महाविकास आघाडी सरकार स्थापनेच्या हालचाली सुरु असताना संजय राऊत हे आपल्या ट्विटच्या माध्यमातून शेरोशायरी शेअर करुन काही संकेत देत होते. आताही संजय राऊत यांना या ट्विटमधून काही राजकीय संदेश द्यायचा आहे का, अशी चर्चा  सुरू झाली आहे. दरम्यान शरद पवार यांनी संयुक्त पुरोगामी आघाडीचे नेतृत्व करावे अशी मागणी संजय राऊत यांनी शनिवारी केली आहे. याआधीही राऊत यांनी ही मागणी केली होती. तसेच सचिन वाझे प्रकरणात काही चुका झाल्या पण यापुढे होणार नाहीत अशी स्पष्ट कबुली राऊत यांनी राजदीप सरदेसाई यांना दिलेल्या मुलाखतीमध्ये दिली आहे.