भाजपचे आमदार आशीष शेलार यांनी महापौर किशोर पेडणेकर यांच्याबद्दल आक्षेपार्ह वक्तव्य केल्याचा आरोप शिवसेनेने केला आहे. तसेच आशीष शेलार यांच्याविरुद्ध गुन्हा दाखल करण्याच्या मागणीसाठी शिवसेनेच्या महिलांच्या शिष्टमंडळाने पोलीस सहआयुक्त विश्वास नांगरे पाटील यांची भेट घेतली. तसेच त्यांना निवेदन देण्यात आले. तसेच महापौर किशोरी पेडणेकर यांनीही गृहमंत्री दिलीप वळसे पाटील यांना पत्र लिहून कारवाईची मागणी केली आहे.
वरळी य़ेथे झालेल्या सिलेंडर स्फोटांसंदर्भात आशीष शेलार यांनी पत्रकार परिषद घेऊन मुंबई महापालिकेवर जोरदार टीका केली होती. तसेच महापौरांवर टीका करताना 'एवढे तास कुठे निजला होतात' असे वक्तव्य केले होते असे सांगत त्यांच्या याच वक्तव्यावर शिवसेनेने आक्षेप घेत आशीष शेलार यांच्याविरोधात तक्रार केली आहे.
दरम्यान भाजपतर्फे आशीष शेलार यांच्यावरील हे सर्व आरोप फेटाळण्यात आले आहेत. तसेच मुंबईच्या प्रथम नागरिक महापौर किशोरी पेडणेकर यांच्यासंबंधित समाजमाध्यमावर आक्षेपार्ह पोस्ट करणाऱ्यां विरोधात कायदेशीर कारवाई करावी अशी मागणी भाजपच्या नगरसेविकांनी मुंबईचे कायदा आणि सुव्यवस्था, सहआयुक्त, विश्वास नांगरे पाटील यांची भेट घेऊन केली. तसेच आशीष शेलार यांच्या वक्तव्याचा विपर्यास करुन ते पसरवण्यात आल्याचा आरोपही भाजपने विश्वास नांगरे पाटील यांना दिलेल्या निवेदनामध्ये करण्यात आला आहे.