'मी सध्या कुठे आहे?' — डॉ. संग्राम पाटील यांची पोस्ट व्हायरल

सध्या सोशल मीडियावर डॉ. संग्राम पाटील यांची “मी सध्या कुठे आहे?” ही पोस्ट मोठ्या प्रमाणात व्हायरल होत आहे. त्यांच्या ठिकाणाबाबत अनेकांनी प्रश्न उपस्थित केल्यानंतर त्यांनी स्वतःच याबाबत स्पष्टीकरण दिलं आहे.

१० जानेवारी रोजी लंडनहून भारतात कुटुंबीयांना भेटण्यासाठी आल्यानंतर, मुंबई विमानतळावर सायबर गुन्ह्याच्या प्रकरणात मुंबई पोलिसांनी त्यांना ताब्यात घेतलं होतं. त्यानंतर त्यांची अनेक तास चौकशी करण्यात आली.

यानंतर १९ जानेवारी रोजी लंडनला परत जात असताना त्यांना पुन्हा मुंबई विमानतळावर अडवण्यात आलं. त्यांच्या नावावर जारी करण्यात आलेलं लुकआऊट सर्क्युलर (LOC) अद्याप कायम असल्यामुळे त्यांना देश सोडण्यास मनाई करण्यात आल्याचं इमिग्रेशन अधिकाऱ्यांनी सांगितल्याचं त्यांनी नमूद केलं आहे.

डॉ. पाटील यांनी आपल्या पोस्टमध्ये स्पष्ट केलं आहे की, ते १० जानेवारीपासून भारतातच आहेत. तसेच, त्यांनी २० जानेवारी २०२६ रोजी मुंबई उच्च न्यायालयात याचिका दाखल केली असून, पोलिसांनी केलेली कारवाई व लावलेले कलम अयोग्य असल्याचा दावा करत संबंधित गुन्हा आणि लुकआऊट सर्क्युलर रद्द करण्याची मागणी केली आहे.

या प्रकरणाची सुनावणी सध्या सुरू असून, पुढील सुनावणी १५ एप्रिल रोजी होणार आहे. न्यायव्यवस्थेवर पूर्ण विश्वास असल्याचंही त्यांनी आपल्या पोस्टमध्ये म्हटलं आहे.

दरम्यान, त्यांच्या या पोस्टनंतर सोशल मीडियावर विविध प्रतिक्रिया उमटत आहेत.