गाण्यांपलीकडच्या आशाताई म्हणजे स्नेह आणि मायेचा महासागर !

Asha Bhosle emotional tribute सुप्रसिद्ध गायिका आशा भोसले यांच्या जाण्यामुळे देशभर शोक व्यक्त होत आहे. दिग्गज पार्श्वगायक सुदेश भोसले यांच्याशी मॅक्स महाराष्ट्रने संवाद साधला असता त्यांनी "मी आज जे काही ते त्यांच्यामुळेच" अशा शब्दात त्यांच्या आठवणींना उजाळा दिला आहे. सुदेश भोसले यांनी सांगितले की, आशा भोसले यांनी त्यांना केवळ व्यावसायिक गायक म्हणून नव्हे तर एक मुलगा म्हणून मला जपत होत्या. त्यांच्या गाण्यांना संधी देण्यापलीकडे, आशाताई त्यांच्या वैयक्तिक आयुष्यातील छोट्या-मोठ्या अडचणींमध्येही काळजी घेत होत्या. सुदेश यांनी सांगितलेल्या काही आठवणी खूपच हृदयस्पर्शी आहेत. आशाताईंनी त्यांना “तुम्ही चांगले गाता, चांगले माणूस आहात, तुमच्यावर विश्वास आहे. रात्री २ वाजताही फोन केलात तरी तुम्हीच येऊन माझ्या कामात मदत कराल,” असे सांगून त्यांच्यावर विश्वास दाखवला.

एकदा सुदेश यांच्या कुटुंबात काही ताणतणाव असताना आशाताईंनी स्वतः घरी येऊन सोन्याच्या प्लेटेड गणेशमूर्तीची स्थापना केली आणि सांगितले की, “तुमची सर्व समस्या दूर होतील.” दुसऱ्या एका प्रसंगी स्टेजवर सुदेश यांना छातीत दुखत असल्याचे पाहून आशाताईंनी दुसऱ्या दिवशीच बॉम्बे हॉस्पिटलमध्ये पूर्ण तपासणीची व्यवस्था केली. गोव्याच्या शिरोडा गावचे असलेल्या सुदेश यांच्या कुलदेवतेच्या (कामाक्षी) बाबतीतही आशाताईंनी विशेष ओळख दाखवली आणि त्यांना आपले आशीर्वाद दिले. सुदेश भोसले यांच्या शब्दांत आशा भोसले केवळ “सुरेल स्वरांची राणी” नव्हत्या, तर स्नेह, माया आणि काळजी यांचा एक मोठा सागर होत्या. त्यांनी सुदेश यांना “माझा मुलगा” म्हणून जपले आणि त्यांच्या आयुष्यातील प्रत्येक महत्त्वाच्या क्षणी साथ दिली.

या संवादातून आशाताईंच्या व्यक्तिमत्त्वाची दुसरी बाजू समोर येते. व्यावसायिक यशाच्या पलीकडे जाऊन माणसांना जोडण्याची त्यांची कला. सुदेश भोसले यांच्यासारख्या अनेक कलाकारांना त्यांनी केवळ संधी दिली नाही, तर त्यांचे संपूर्ण व्यक्तिमत्त्व घडवण्यात मोठा वाटा उचलला. आशा भोसले यांच्या या मायाळू स्वभावामुळेच आज सुदेश भोसले सारखे गायक मनमोकळेपणाने सांगू शकतात, “मी आज जे काही ते त्यांच्यामुळेच.”