साधुंच्या नावाखाली जमीन सपाट करुन उद्योजकांचं हित जपायचंय का ?– राज ठाकरे
महाराष्ट्र नवनिर्माण सेनेचे अध्यक्ष राज ठाकरे यांनी नाशिक येथील वृक्षतोडीवर तीव्र नाराजी व्यक्त केली आहे. कुंभमेळ्याचं कारण दाखवून झाडं तोडायची, साधूंच्या नावाने ती जमीन सपाट करून घ्यायची आणि मग नंतर पुढे ती आपल्या लाडक्या उद्योगपतीला दान करायची ! इतकाच विचार या सरकारचा असणार असल्याची शक्यता राज ठाकरेंनी समाजमाध्यमांवर पोस्ट करत उपस्थित केली.
राज ठाकरे यांनी फेसबुक पोस्ट करत म्हणाले की, "आगामी नाशिक कुंभमेळ्यासाठी राज्य सरकारने तब्बल १८०० झाडांची तोड करण्याचा घेतलेला निर्णय अत्यंत चुकीचा,अवैज्ञानिक आणि जनमताचा अपमान करणारा आहे. नाशिकमध्ये कुंभमेळा हा काही पहिल्यांदाच होत नाही. मनसेच्या महापालिकेच्या सत्ताकाळातही कुंभमेळा झाला आणि तेव्हाही मोठ्या प्रमाणात पायाभूत सुविधा उभारल्या गेल्या. त्या काळात नगरसेवक–प्रशासन उत्तम समन्वयाने काम करत होते. जनतेच्या गरजा लक्षात घेऊन नियोजन झाले. इतके उत्कृष्ट नियोजन होते की, तत्कालीन महापौर आणि महापालिका आयुक्त यांचा अमेरिकेत सत्कार झाला होता. महत्त्वाचे म्हणजे त्यावेळी एकही झाड तोडावं लागलं नव्हतं. मग आत्ता या कुंभमेळ्यासाठी झाडं का तोडावी लागत आहेत ? असा सवाल राज ठाकरे यांनी उपस्थित केला आहे.
कुंभमेळ्यासाठी झाडांचं बलिदान का ?
सरकार सांगते तशी पोकळ आश्वासने “झाडे तोडू, दुसरीकडे लावू” प्रत्यक्षात कधीच पूर्ण होत नाहीत. जर सरकारकडे पाचपट झाडे लावण्याइतकी जमीन आहे, तर मग साधुग्राम त्या जागेतच करा, असा सल्ला राज ठाकरे यांनी दिला आहे.
सरकार साधूंच्या नावाखाली जमीन सपाट करून नंतर उद्योगपतींच्या हितासाठी काहीतरी ‘दान’ करण्याचा संधिसाधूपणा करते आहे, अशी जनतेची ठाम भावना आहे. काही वर्षांपूर्वी लाखो-कोटी झाडे लावल्याचा मोठा गाजावाजा झाला. परंतु ती झाडे कुठेच दिसली नाहीत. अशी सनसनाटी टीका राज ठाकरेंनी महायुतीच्या सरकारवर केली आहे.
आज कुंभमेळ्याचे कारण देऊन झाडे तोडणे,ती जमीन नंतर आपल्या लाडक्या उद्योगपतींना देणे हा जर सरकारचा खरा विचार असेल,तर महाराष्ट्रातील जनता ते सहन करणार नाही. सध्या राज्यात मंत्र्यांचे,आमदारांचे व त्यांच्या वर्तुळातील लोकांचे जमिनी गिळण्याचे आणि दलालीचेच व्यवहार सुरू असल्याची परिस्थिती अधिक चिंताजनक असल्याचं राज ठाकरे यांनी त्यांच्या पोस्ट मध्ये म्हटले आहे.
नाशिककरांचा या वृक्षतोडीला प्रखर विरोध आहे. म्हणूनच नाशिककरांनो,ठाम रहा तुमच्या पाठीशी महाराष्ट्र नवनिर्माण सेना भक्कमपणे उभी आहे. ही भूमिका राजकारणासाठी नाही.येणाऱ्या निवडणुकांशीही तिचा संबंध नाही.निवडणुका झाल्यानंतरही मनसेचा या वृक्षतोडीला तितकाच तीव्र विरोध राहील. परंतु,जर सरकार संघर्षाचीच भूमिका घेणार असेल,तर जनतेच्या सोबत महाराष्ट्र नवनिर्माण सेना लढ्यात उभी राहील आणि शेवटपर्यंत राहील! असा शब्दही नाशिकच्या जनतेला राज ठाकरेंनी दिला.
