Raymond brand history : भारतीय उद्योगाचा सुवर्णकाळ आणि सिंघानिया यांचे योगदान
Vijaypat Singhania death बजाज गेले, टाटा गेले... काल सिंघानियाही गेले.
भारतीयच नव्हे तर जगभरातील उद्योग क्षेत्रावर सुप्रसिद्ध उद्योगपती पद्मभूषण विजयपत सिंघानियांच्या मृत्यूच्या बातमीने शोककळा पसरली आहे. रेमंड्स हा ब्रँड जगभरात लोकप्रिय करणारे विजयपत सिंघानिया हे भारतीय उद्योगपती होते ही तमाम भारतीयांसाठी अत्यंत अभिमानाची गोष्ट होती. त्यांच्या जाण्याने भारतीय उत्पादक्षमतेच्या उद्योगांचे एक युग संपल्यासारखे वाटते.
आजकाल सर्व्हिस इंडस्ट्रीज, हॉटेल इंडस्ट्रीज, बिल्डर्स, रिफायनरीज यांचा उद्योगात बोलबाला आहे. पण जे आर डी टाटांच्या पावलावर पाऊल ठेवून ज्यांनी हिंदुस्थानला उद्योग जगतात प्रतिष्ठा मिळवून दिली अशांपैकी रेमंड्स या अत्यंत महागड्या आणि प्रतिष्ठेच्या कापड व्यापारात सिंघानिया कुटुंबीयांची कायम आघाडी राहिली. आजकाल खुल्या अर्थव्यवस्थेनंतर आपण सगळे मध्यमवर्गीय लोक ब्रँडेड कपडे वापरायला लागलो. जगातले विविध ब्रँड्स आपल्यासाठी खुले झाले. पण लग्नकार्य, कौटुंबिक कार्यक्रम, ऑफिस फँक्शन्सना सुटबुटात जायचे ते रेमंड्सच्या गुळगुळीत पॉश कपड्यांमधूनच.!
विजयपत सिंघानिया यांच्या आयुष्याची गोष्ट एखाद्या हिंदी चित्रपटापेक्षा कमी नाही. उद्योगासोबतच विजयपत सिंघानियांना अवकाशावर भरारी घ्यायचे धाडसी वेड होते. त्यांच्या अफलातून वैमानिक असण्याच्या या मास्टर गुणवत्तेने त्यांना जगभरात प्रसिद्धी मिळाली. बलून अडव्हेंचरमध्ये त्यांनी वर्ल्ड रेकॉर्ड केले. भारतीय हवाईदलातर्फे त्यांना सन्मानित करण्यात आले. अशा हरहुन्नरी उद्योगपतीच्या आयुष्याच्या उत्तरार्धात मात्र त्यांना कौटुंबिक कलहाला सामोरे जावे लागले. त्यांचे मोठे चिरंजीव गौतम सिंघानिया यांच्याशी त्यांचे कोर्टात वाद झाले. जवळपास ११,५०० कोटी रुपयांची संपत्ती निर्माण करणाऱ्या विजयपत सिंघानियांना वृद्धत्वामध्ये भाड्याच्या फ्लॅटमध्ये राहण्याची वेळ आली यासारखे. दुर्दैव कोणते.! असे म्हटले जाते की, विजयपत सिंघानिया यांच्या उदाहरणे भारतीयांना, कितीही लाडकी असली तरी आपल्या मुलांच्या नावे सगळी संपत्ती करू नये असा धडा दिला.!
एवढ्या मोठ्या बापाला जर पोरं रस्त्यावर उतरवू शकतात तर तुम्ही आम्ही किस झाड की पत्ती नाही का.!! असो. रेमंड्स शूटिंग आणि सिंघानिया हे दीडशे कोटी भारतीयांसाठी अभिमानाचे नाव होते आणि यावछंद्र दिवाकरो राहील.! पद्मभूषण उद्योगपती विजयपत सिंघानिया यांना मानाचा अखेरचा मुजरा आणि भावपूर्ण श्रद्धांजली...
