Pandharpur | माढा तालुक्यातील अंजनगाव खेलोबा येथील तणाव निवळला; पोलिसांचा मोठा बंदोबस्त तैनात

पंढरपूर | माढा तालुक्यातील अंजनगाव खेलोबा येथे महापुरुषांच्या पुतळ्यावरून दोन समाजांत मोठा तणाव निर्माण झाला होता. या पार्श्वभूमीवर दोन्ही समाज आमने-सामने येत दगडफेकीच्या घटना घडल्या. परिस्थिती नियंत्रणात आणण्यासाठी पोलिसांनी लाठीचार्ज केला.सध्या अंजनगाव येथील परिस्थिती नियंत्रणात असून पोलिसांचा मोठा फौजफाटा तैनात करण्यात आला आहे.

दरम्यान, अंजनगाव खेलोबा येथील ज्या ठिकाणी महापुरुषांचा पुतळा उभारण्यात आला आहे, ती जागा विशिष्ट समाजाच्या खेलोबा देवस्थानाची असल्याचा दावा करण्यात येत आहे. तर दुसऱ्या समाजाकडून ती जागा शासनाची असल्याचा दावा करण्यात आला आहे.

या प्रकरणी पोलीस अधीक्षक अतुल कुलकर्णी यांनी दोन्ही बाजूंची बैठक घेतली. संबंधित जागेची मोजणी करूनच पुतळ्याबाबत अंतिम निर्णय घेतला जाईल, असे ठरवण्यात आले आहे.

दरम्यान, पुतळा हटवण्याचा प्रयत्न झाल्यानेच हा तणाव निर्माण झाला असून, त्यातून दगडफेक झाली आणि पोलिसांना लाठीचार्ज करावा लागला.