Constitutional Oath Violation : नितेश राणेंकडून शपथेचा भंग! राज्यपाल महोदय कारवाई करणार का?
Constitutional Oath Violation राजकीय नेते जेव्हा लोकप्रतिनिधी म्हणून निवडून येतात तेव्हा ते एका जबाबदारीसह घटनात्मक पदावर विराजमान होत असतात. तेच नंतर मंत्रिमंडळात सामील होतात तेव्हा त्यांची जबाबदारी वाढते. त्याचं दृष्टिकोनातून त्यांना राज्याचे राज्यपाल संविधानिक पदाची शपथ देतात. घटनात्मक पदाची गरिमा, निष्ठा, नैतिकता सांभाळत जनतेच्या सेवेला प्रथम प्राधान्य देण्याची ग्वाही देतात. अशातच संविधानिक पदाच्या शपथेचे उल्लंघन जाहीररित्या केल्यास संबंधित मंत्र्यांवर काय कारवाई होणार? किंवा राज्यपाल आणि मुख्यमंत्री कारवाई करणारा का ? असा सवाल उपस्थित होतो.
सध्याच्या राजकारणात एक नाव सर्वाधिक चर्चेचा विषय असते ते म्हणजे भाजप नेते आणि मंत्री नितेश राणे… नितेश राणे हिंदू-मुस्लीम राजकारण करतानाचं चित्र आपल्याला पाहायला मिळते. घटनात्मक पदावर असलेल्या नितेश राणे यांनी सातत्याने जाहीररित्या हिंदू-मुस्लीम द्वेष पसरवण्याच्या हेतूने भाष्य केलं आहे. मात्र, घटनात्मक पदाचं भान त्यांना या ठिकाणी राहत नाही, अशातच त्यांच्यावर शपथ भंग केल्याची कारवाई होणार की नाही हा प्रश्न मॅक्स महाराष्ट्रने मुख्यमंत्री देवेंद्र फडणवीस आणि राज्यपाल आचार्य देवव्रत यांना विचारला आहे.
मॅक्स महाराष्ट्रने नितेश राणे यांच्या शपथविधीच्या व्हिडिओसोबत त्यांनी केलेली द्वेषात्मक भाषणांचे व्हिडिओ प्रसारित केले आहे.
या शपथेत त्यांनी प्रथम भारतीय संविधानाप्रती निष्ठा, देशाची सार्वभौमता आणि एकता अबाधित ठेवण्याची, कायद्यानुसार कर्तव्ये पार पाडण्याची आणि सर्वांना समान न्याय देण्याची ग्वाही दिली.
मात्र, त्यानंतर त्यांनी अत्यंत वादग्रस्त विधाने केली. “हा हिंदू राष्ट्र आहे, फक्त ‘जय श्रीराम’ म्हणणाऱ्यालाच पंतप्रधान, मुख्यमंत्री किंवा महापौर होता येईल,” असे ते म्हणाले. तसेच महानगरपालिका, नगरपालिका अशा स्थानिक स्वराज्य संस्थांमध्येही फक्त महादेवाचे भक्त असणाऱ्यांनाच पदे मिळतील, असेही ते जाहीररित्या म्हणाले आहेत. पुढे बोलताना त्यांनी रामगिरी महाराज यांच्यावर टीका केल्यास हिंसक कारवाई करण्याची धमकी दिली. मशिदींचा उल्लेख करत तसेच इम्तियाज जलील, असदुद्दीन ओवेसी यांच्यासारख्या नेत्यांचा उल्लेख करून “हिरवे” सोडून “भगवे” व्हा, अन्यथा परिणाम भोगावे लागतील, अशा प्रकारची भाषा वापरली आहे.
याशिवाय जिल्हा निधी, ग्रामपंचायती आणि सरपंचांवर नियंत्रण ठेवण्याची, निधी थांबवण्याची आणि फक्त भाजपच्या कमळ चिन्हाला प्राधान्य देण्याचीही त्यांनी स्पष्टपणे घोषणा केली. या सर्व विधानांमुळे संविधानिक शपथेचा भंग झाल्याचं पाहायला मिळत आहे. यासंदर्भात नितेश राणेंविरोधात राज्यपाल काय कारवाई करणार याकडे लक्ष लागले आहे.
राज्यपाल काय करू शकतात?
संविधानिक पदाच्या शपथेचे उल्लंघन केल्यास राज्यपाल संबंधित मंत्र्याला पदमुक्त (बडतर्फ) करू शकतात. घटनेच्या कलम १६४ नुसार, मुख्यमंत्री आणि इतर मंत्र्यांची नियुक्ती राज्यपालांद्वारे मुख्यमंत्र्यांच्या सल्ल्याने केली जाते आणि राज्यपाल केवळ मुख्यमंत्र्यांच्या सल्ल्यानेच मंत्र्याला बडतर्फ करू शकतात.
